काळेवाडी, ता.१२ : काळेवाडी ग्रामस्थ आणि पंचनाथ उत्सव समितीतर्फे आयोजित श्री पंचनाथ महाराज उत्सव मोठ्या उत्साहात पार पडला. त्यानिमित्त पालखी मिरवणुकीबरोबरच मनोरंजनाचे कार्यक्रम आणि कुस्त्यांचा आखाडा रंगला.
उत्सवाच्या पहिल्या मुख्य दिवशी सकाळी ग्रामदेवतेची पारंपरिक पद्धतीने अभिषेक व महाआरती झाली. त्यानंतर उत्सव समितीच्यावतीने प्रसाद वाटप झाले. सायंकाळी पंचनाथ महाराजांचा पालखी सोहळा झाला. ज्योतिबा पादुकाचे पूजन करुन गणपती मंदिर, ज्योतिबानगर, आझाद चौक येथून ढोल-ताशांच्या गजरात पालखी मिरवणूक काळेवाडी गावठाण मार्गे पंचनाथ चौकात आली. उत्सवानिमित्त ‘मदमस्त अप्सरा’ हा लावण्यांचा कार्यक्रम झाला. दुसऱ्या दिवशी ज्योतिबा उद्यान येथे पंचनाथ केसरी कुस्त्यांचे आयोजन करण्यात आले. त्यामध्ये २५ किलोपासून ते खुल्या वजन गटांतील मल्लांनी कुस्तीत सहभाग नोंदविला. यावेळी ‘पंचनाथ केसरी’ची अंतिम कुस्ती अक्षय मंगवडे (महाराष्ट्र चॅम्पियन) व दिल्लीचा मल्ल अजय गुज्जर (हिंद केसरी) यांच्यात झाली. ‘पंचनाथ केसरी’ किताब आणि चांदीची गदा मंगवडे याने जिंकली.