तळेगाव दाभाडे, ता. ४ ः मावळ येथील सहयोग फाउंडेशनच्या वतीने ईगल कंपनीजवळील तळ्याकाठी असलेल्या वृक्षराईमध्ये पशुपक्ष्यांना खाद्य उपलब्ध करून देण्यासाठी खाऊ गल्लीचे नियोजन करण्यात आले आहे. या योजनेचे उद्‍घाटन तळेगाव दाभाडे नगर परिषदेच्या उपमुख्याधिकारी ममता राठोड यांच्या हस्ते करण्यात आले.
फाउंडेशनच्या वतीने मातीच्या भांड्यांमध्ये पशूपक्ष्यांसाठी लागणारे खाद्य वनराईमध्ये ठेवले जाणार आहे. तसेच, प्रत्येक आठवड्यातून एक-दोनवेळा त्याठिकाणी जाऊन खाद्य टाकण्यात येणार आहे, असे संस्थापक अध्यक्ष संदीप पानसरे यांनी सांगितले.
याप्रसंगी प्रमुख पाहुणे म्हणून शिक्षण मंडळाचे माजी सभापती सुहास गरुड, रोटरी क्लबचे उपाध्यक्ष श्रीशैल मेहंते, सचिव प्रमोद दाभाडे, सोनबा गोपाळे, ज्ञानेश्वर बोराडे, राजेंद्र पाटील, संजय दिवेकर, मोनाली पानसरे आदी उपस्थित होते. पानसरे यांची कन्या आराध्या हिच्या वाढदिवसानिमित्त हा उपक्रम सुरू करण्यात आला आहे. नगर परिषदेच्या हद्दीतील ईगल तळ्याकाठी मुबलक पाणी व प्रचंड वृक्षराई असल्याने येथे लहान-मोठे हजारो पक्षी वस्ती करून राहत आहेत. त्यांना खाद्याची टंचाई निर्माण होऊ नये, त्यांना सहजरित्या सावली, पाणी आणि अन्न उपलब्ध व्हावे म्हणून, ही खाऊ गल्ली पशू-पक्षांसाठी सुरू करण्यात आल्याचे संदीप पानसरे यांनी सांगितले. उपमुख्याधिकारी ममता राठोड यांनी या उपक्रमाचे कौतुक केले. विवेक भगत यांनी स्वागत आणि आभार मानले.