तळेगाव दाभाडे, ता. १५ : कामशेत येथील किराणा साहित्याच्या दुकानातून चोरट्यांनी एक लाख रुपयांचा ऐवज लंपास केला. विशेष म्हणजे, हे दुकान पोलिस ठाण्याशेजारीच आहे. त्यामुळे चोरट्यांनी डाव साधल्याने अनेक प्रश्न निर्माण होत आहेत.
या प्रकरणी महावीर सुखमल जैन यांनी फिर्याद दिली आहे. जैन यांचे पोलिस ठाण्याशेजारी भोला ट्रेडर्स नावाने दुकान आहे. मंगळवारी (ता.१५) पहाटे शटरचे कुलूप तोडून चोरट्यांनी दुकानातील ऐवज पळवला. दरम्यान, चोरट्यांनी गेल्यावर्षी महावीर जैन यांच्याच दुकानातून तब्बल २५ लाखांचा ऐवज लंपास केला होता. गेल्या वर्षभरात अनेक दुकाने घरफोड्या झाल्या, मात्र गुन्हे उघडकीस आणण्यात पोलिसांना यश आलेले नाही. त्यामुळे कामशेत शहरातील चोऱ्या थांबवण्यासाठी रात्रीची गस्त वाढवावी, अशी मागणी रोहिदास वाळुंज, व्यापारी असोसिएशनचे अध्यक्ष विलास भोवरा, सुभाष रायसोनी यांनी केली आहे.

वर्षभरात २५ चोऱ्या, तपासात अपयश
कामशेत शहरातील चोऱ्यांचे प्रमाणात वाढ झाली आहे. याबाबत अधिक माहिती घेतली असता, गेल्या वर्षभरात शहर परिसरात चोरीच्या विविध २५ घटना घडल्या आहेत. पण, एकाही प्रकरणातील चोरट्यांना पकडण्यात पोलिसांना यश आलेले नाही. त्यामुळे व्यापारी आणि नागरिकांमध्ये असुरक्षित वातावरण निर्माण झाले आहे.