तळेगाव दाभाडे, ता. २५ : वेगाने जाणाऱ्या ट्रेलरने सात वाहनांना धडक दिली. यात दोन महिलांचा जागीच मृत्यू झाला, तर पाच जण गंभीर जखमी झाले. हा अपघात मुंबई-पुणे द्रुतगती महामार्गावर खोपोलीजवळ शनिवारी सायंकाळी चारच्या सुमारास घडला.
खोपोलीजवळील किलोमीटर ३७ परिसरात पुण्याहून मुंबईकडे वेगाने जाणारा ट्रेलर अचानक ब्रेक न लागता पुढे असलेल्या वाहनांवर आदळला. त्यावेळी ट्रेलरने सुरुवातीला इर्टिगा कारला धडक दिली, त्यानंतर सियाझ आणि ह्युंदायी या दोन कार्स तसेच एका बसला जोरदार धडक दिली. यानंतर स्विफ्ट कारला मागून धडक देत तिने समोरील बसच्या केबिनमध्ये घुसखोरी केली. स्विफ्टमधील प्रवासी गंभीर जखमी झाले.
या अपघातात स्विफ्टमधील अश्विनी अक्षय हळदणकर (वय अंदाजे ३०, रा. कोल्हापूर) आणि श्रेया संतोष अवताडे (वय १७, रा. घाटकोपर) या दोन महिलांचा जागीच मृत्यू झाला. अन्य जखमींमध्ये वसुधा विजय जाधव (रा. कोल्हापूर), सारिका अवताडे (रा. घाटकोपर), सारिका विजय जाधव (वय ९), अविनाश विजय जाधव (वय ३, दोघेही रा. कोल्हापूर) आणि अक्षय हळदणकर यांचा समावेश आहे.
अपघाताची माहिती मिळताच महामार्ग पोलिस, आयआरबी यंत्रणा, देवदूत आपत्ती व्यवस्थापन पथक, हेल्प फाउंडेशन व खोपोली पोलिस दाखल झाले. त्यांनी तत्काळ मदत व बचावकार्य सुरू करत जखमींना जवळच्या रुग्णालयात नेले. अपघातग्रस्त वाहने क्रेनच्या सहाय्याने बाजूला करून वाहतूक सुरळीत करण्यात आली.