तळेगाव दाभाडे, ता. ११ : पीएमआरडीए (पुणे महानगर प्रदेश विकास प्राधिकरण) क्षेत्रातील नियमबाह्य गृहप्रकल्पांवर कारवाईसाठी अखेर १५ दिवसांची अंतिम मुदत जाहीर करण्यात आली आहे. याबाबतचे निर्देश अधिकाऱ्यांना देण्यात आले.
विधानसभेचे उपाध्यक्ष अण्णा बनसोडे यांच्या अध्यक्षतेखाली झालेल्या फेरआढावा बैठकीत संबंधित अधिकाऱ्यांना निर्देश देण्यात आले. मावळचे आमदार सुनील शेळके यांनी विधानसभेत उपस्थित केलेल्या मुद्द्यांच्या पार्श्वभूमीवर या प्रकरणाचा पाठपुरावा करण्यात आला.
मोठ्या गृहप्रकल्पांना पीएमआरडीएकडून नियम डावलून पूर्णत्वाचे दाखले दिले जात असल्याच्या तक्रारी आमदार शेळके यांनी विधानसभेत मांडल्या होत्या. यासंदर्भात १९ जून रोजी झालेल्या बैठकीत संबंधित प्रकल्पांची यादी, कारवाईचा तपशील आणि विकासकांविरोधातील लेखी तक्रारी आठ दिवसांत सादर करण्याचे आदेश देण्यात आले होते.
या बैठकीला पीएमआरडीएचे आयुक्त डॉ. योगेश म्हसे, पिंपरी-चिंचवड महापालिकेचे आयुक्त शेखर सिंह, मावळचे उपविभागीय अधिकारी सुरेंद्र नवले, तहसीलदार विक्रम देशमुख आदी अधिकारी उपस्थित होते.

दूषित पाणी, सांडपाण्याचा थेट नद्यांमध्ये विसर्ग
फेरआढावा बैठकीत सादर अहवालात मावळ तालुक्यातील काही प्रकल्पांत दूषित व पिण्यायोग्य नसलेले पाणी पुरवले जात असल्याचे उघड झाले. काही प्रकल्पांमधून सांडपाण्यावर प्रक्रिया न करता थेट पवना व इंद्रायणी नद्यांमध्ये सोडले जात असल्याने पर्यावरणाला धोका निर्माण झाला आहे.