विजय सुराणा ः सकाळ वृत्तसेवा
तळेगाव दाभाडे, ता. १२ : पुणे जिल्हा नियोजन समितीतील सदस्यपदावरून महायुतीच्या तिन्ही पक्षांमध्ये चुरस निर्माण झाली आहे. भाजप, राष्ट्रवादी कॉंग्रेस आणि शिवसेना या घटक पक्षांमध्ये प्रतिनिधित्वासाठी जोरदार रस्सीखेच सुरू आहे.
जिल्हा नियोजन समिती (डीपीसी), संजय गांधी निराधार योजना, स्वस्त धान्य योजना, महिला व बालकल्याण समित्या, पोलिस दक्षता समिती, जिल्हा क्रीडा समिती अशा अनेक शासकीय समित्यांत पदाधिकाऱ्यांची नियुक्ती होणार आहे.  या समित्यांमधून विकासकामांसाठी निधी मंजूर होतो, तसेच स्थानिक राजकारणात प्रभाव निर्माण होतो. त्यामुळे प्रत्येक पक्षातील कार्यकर्ते आणि गट आपल्या नावाची जोरदार शिफारस करत आहेत.
आमदार सुनील शेळके यांच्या शिफारशीला महत्त्व दिले जाईल, असे संकेत असूनही, अंतिम निर्णय उपमुख्यमंत्री अजित पवार, देवेंद्र फडणवीस आणि एकनाथ शिंदे यांच्या एकत्र बैठकीत ठरणार असल्याची माहिती आहे. यामुळे स्थानिक पातळीवर काम करणाऱ्या इच्छुक कार्यकर्त्यांमध्ये अस्वस्थता आहे.

नेत्यांची कसरत सुरू
महायुतीतील स्थानिक पदाधिकाऱ्यांच्या गटबाजीमुळे प्रमुख नेत्यांसमोर तारेवरची कसरत आहे. एकाच पदासाठी अनेक नावांची शिफारस होत असल्याने समन्वय ठेवणे आणि संतुलन साधणे ही मोठी जबाबदारी झाली आहे. समित्यांतील निवड ही केवळ सन्मानाची बाब नसून, आगामी स्थानिक स्वराज्य संस्थांच्या निवडणुकांसाठीही मोर्चेबांधणी समजली जात आहे.

ग्रामपातळीपासून जिल्ह्यांपर्यंत परिणाम
या पदांवर कोणाची वर्णी लागते, यावरून आगामी काळातील राजकीय समीकरणे स्पष्ट होणार आहेत. मावळ तालुक्यात सध्या राष्ट्रवादी कॉंग्रेस व भाजपमध्ये अंतर्गत शह-काटशह सुरू आहे. शिवसेनाही या स्पर्धेत मागे नाही. त्यामुळे जिल्हा नियोजन समितीच्या सदस्यपदाची घोषणा म्हणजे तीन पक्षांच्या अंतर्गत शक्तीप्रदर्शनाचे मैदान ठरणार आहे.

निवड लवकरच
जिल्हास्तरीय समित्यांमध्ये सदस्यपदासाठी प्रस्तावांची अंतिम यादी तयार करण्याची प्रक्रिया अंतिम टप्प्यात आली असून, काही दिवसांत अधिकृत यादी जाहीर होण्याची शक्यता आहे. कोणाच्या गटाला संधी मिळणार? कोण नावे गाजवणार आणि कोणाची नाराजी वाढणार? हे पाहणे उत्सुकतेचे ठरणार आहे. शहरी व ग्रामीण भागातील विविध विकास कामांचा आराखडा पालकमंत्री यांच्या अध्यक्षतेखाली जिल्हा नियोजन समितीच्या बैठकीत सादर केला जातो. 

राष्ट्रवादी व भाजप इच्छुकांची गर्दी
भाजपचे माजी मंत्री बाळा भेगडे व किसान मोर्चाचे प्रदेशाध्यक्ष गणेश भेगडे यांची भाजपच्या राज्य परिषद सदस्यपदी वर्णी लागली आहे. त्यामुळे आता जिल्हा नियोजनासाठी कुणाची वर्णी लागणार, या बाबत चर्चा सुरू झाली आहे. राष्ट्रवादी काँग्रेसमधील अंतिम नाव हे आमदार सुनील शेळके यांच्या शिफारसीने होईल तर; शिवसेना तालुकाप्रमुख राजेश खांडभोर व शरद हुलावळे यांच्या नावाची चर्चा आहे. राज्यात महायुती असल्याने आरपीआय पक्षाला देखील एक जागा द्यावी लागणार आहे. त्यामुळे या महत्त्वाच्या पदासाठी सर्वच इच्छुकांनी मोर्चेबांधणीला सुरवात केली आहे.