तळेगाव दाभाडे, ता. १६ ः मावळ तालुक्यातील शिवणे मंडल अधिकारी आणि त्याच्या एका साथीदाराला दोन लाख १० हजार रुपयांची लाच घेताना लाचलुचपत प्रतिबंधक विभागाने (एसीबी) सापळा रचून पकडले. एमआयडीसी भोसरी पोलिस ठाण्याच्या हद्दीत स्पाईन रोडवर मंगळवारी ही कारवाई करण्यात आली.
मारुती महादेव चोरमले (वय ५३) असे अटक केलेल्या मंडल अधिकाऱ्याचे नाव आहे. त्याच्यासह खासगी व्यक्ती जयेश बाळासाहेब बारमुख (वय ३३, रा. चांदखेड, ता. मावळ) यालाही अटक करण्यात आली आहे. या प्रकरणी ४६ वर्षीय व्यक्तीने एसीबीकडे तक्रार केली आहे.
एसीबीचे सहायक पोलिस आयुक्त दयानंद गावडे यांनी दिलेल्या माहितीनुसार, तक्रारदार यांची बहीण आणि इतर २१ जणांनी मिळून २०१८ व २०१९ मध्ये बांधकाम व्यावसायिक पूर्णचंद्र सनातन स्वाईन यांना एक कोटी ९० लाख रुपये देऊन त्यांच्याकडून कुसगाव मावळ येथील ३८ गुंठे जमीन विकसन करारनामा करून घेतली. त्यानंतर स्वाईन यांनी तीच जमीन दुसऱ्या व्यक्तीला विकली. त्या जागेचे खरेदी खत झाल्यानंतर सातबारा उताऱ्यावर नोंद घेण्यासाठी संबंधित तलाठी कार्यालयात अर्ज केला. तलाठ्याने त्या व्यक्तीची फेरफार नोंद करून तो मंजुरीसाठी मंडल अधिकारी चोरमले यांच्याकडे पाठवला.
संबंधित फेरफार मंजूर न होण्यासाठी तक्रारदार यांची बहीण आणि इतर २१ जणांनी हरकत घेतली. त्याप्रमाणे चोरमले यांनी हरकत अर्जावर सुनावणी सुरू केली. नवीन झालेला फेरफार रद्द करण्यासाठी तसेच ३८ गुंठे वादग्रस्त जमीन तक्रारदार यांची बहीण आणि इतर २१ जणांच्या नावावर होण्यास मदत करण्यासाठी चोरमले यांनी तक्रारदार यांच्याकडे दोन लाख रुपयांची लाच मागितली. तसेच सहकारी जयेश बारमुख याला भेटण्यास सांगितले. बारमुख यांनी चोरमले यांच्यासाठी दोन लाख रुपये आणि स्वतःसाठी दहा हजार रुपये लाच मागितली. चोरमले यांनी दोन लाख रुपये रोख स्वरूपात; तर जयेश बारमुख याने १० हजार रुपये ऑनलाइन माध्यमातून लाच घेतली.