तळेगाव दाभाडे, ता. १८ ः तळेगाव रेल्वे स्थानकावर सिंहगड एक्सप्रेसला थांबा देण्यासाठी प्रवाशांनी उच्च न्यायालयात याचिका दाखल केली आहे. पुणे प्रवासी संघटनेच्या नेतृत्वाखालील या याचिकेत रेल्वे प्रशासनाकडून वारंवार दुर्लक्ष केल्याचा आरोप करण्यात आला आहे.
वकील नितेश नेवशे यांच्यामार्फत दाखल केलेल्या याचिकेत म्हटले आहे की, ‘‘वृद्ध, दिव्यांग, नोकरदार, विद्यार्थी आणि स्थानिक प्रवाशांना तळेगाव स्थानकावर थांबा नसल्यामुळे मोठा त्रास सहन करावा लागत आहे. कोविडनंतर लोणावळा-पुणे लोकल सेवेची दुपारची गाडी बंद असून, खासगी प्रवास महागडा असल्यामुळे प्रवासी अडचणीत सापडले आहेत. रेल्वे प्रशासन मासिक पास जारी करत असले तरी अनेक गाड्यांमध्ये पासधारकांना प्रवेश दिला जात नाही. रिकाम्या सीट्स असूनही हा भेदभाव होत आहे, हे सरळ आर्थिक शोषण असल्याचा संघाचा आरोप आहे. पर्यायी उपाय म्हणून, याचिकेत दुपारी लोकल गाड्या वाढवणे, मासिक पासधारकांना सर्व गाड्यांमध्ये प्रवासाची मुभा देणे आणि आरक्षणाची सुविधा उपलब्ध करून देण्याची मागणी करण्यात आली आहे.
तळेगाव हे औद्योगिक, शैक्षणिक आणि धार्मिक दृष्टिकोनातून महत्त्वाचे ठिकाण असून, इथून हजारो नागरिक दररोज प्रवास करतात. परंतु, त्यांच्या मागण्यांकडे सातत्याने दुर्लक्ष होत आहे.’’ या याचिकेची दखल घेत न्यायालयाने रेल्वे प्रशासनास नोटीस पाठवून उत्तर मागवले आहे.
---