तळेगाव दाभाडे, ता. १९ ः आधुनिक तंत्रज्ञानाच्या युगात इ-मेल, सोशल मीडियाचा वापर वाढला असताना येथील युवक अंकुश रामचंद्र दाभाडे या आगळ्यावेगळ्या छंदासाठी ओळखले जातात.
त्यांनी पारंपरिक पत्रव्यवहाराचा छंद जपताना अनेक दिग्गजांशी या माध्यमातून संवाद साधला आहे. याशिवाय त्यांच्या संग्रहात तब्बल १०२ देशांच्या चलनी नोटा आणि नाणी आहेत.
ते म्हणाले की, माझ्यावर लहान वयातच जबाबदारी आली. त्यामुळे कष्ट करण्याची सवय लागली. शालेय वयात वाचनाची गोडी लागली. त्यातून मुंबईतील राजन तेंडुलकर नामक छांदिष्ट व्यक्तीची माहिती मिळाली. ते अनेक प्रकारचे संग्रह करीत. आपणही तसे करावे असे वाटले. रुजली. त्यानंतर कवी ग. दि. माडगुळकर यांना पुरस्कार मिळाल्याबद्दल पत्र लिहिले. त्यांचे उत्तर आले. मग पुढे छंद वाढत गेला. पुणे शहर व परिसरात भटकंती करताना अनेक देशांच्या चलनी नोटा आणि नाणी जमविण्यास सुरवात केली.
दाभाडे यांनी लेखक, शास्त्रज्ञ, राजकीय व्यक्ती अशा विविध क्षेत्रांतील दिग्गजांशी पत्रव्यवहार केला आहे. त्यांच्याकडे तब्बल ८०० पेक्षा जास्त पत्रे आहेत. याशिवाय टपाल तिकिटे, भेटकार्डाचाही संग्रह त्यांच्याकडे आहे. आजच्या धकाधकीच्या युगात त्यांचा असा छंद प्रेरणादायक ठरला आहे.
---
माझ्या संग्रहात राष्ट्रपती के. आर. नारायणन, अटलबिहारी वाजपेयी, बाळासाहेब ठाकरे, कविवर्य वि. वा. शिरवाडकर, शाहीर योगेश साबळे, मदर टेरेसा, अमिताभ बच्चन, विजय गोखले अशा दिग्गजांची पत्रे आहेत. मला छायाचित्रणाचीही आवड आहे.
- अंकुश दाभाडे
-----