तळेगाव दाभाडे, ता. २४ : मावळ तालुक्यातील आगामी स्वराज्य संस्थांच्या निवडणुका जाहीर होण्यास काही महिन्यांचा कालावधी बाकी असला तरी मावळ तालुक्याचे राष्ट्रवादी काँग्रेसचे आमदार सुनील शेळके यांनी तळेगाव दाभाडे नगराध्यक्षपदाचे उमेदवार म्हणून भाजपचे शहराध्यक्ष संतोष दाभाडे यांची उमेदवारी बुधवारी (ता. २४) रात्री जाहीर केली.
याबाबत आमदार शेळके म्हणाले, ‘‘राज्यात भाजपचे मुख्यमंत्री म्हणून देवेंद्र फडणवीस आहेत. राष्ट्रवादी काँग्रेसचे उपमुख्यमंत्री अजित पवार आहेत. शिवसेनेचेच उपमुख्यमंत्री म्हणून एकनाथ शिंदे आहेत. महायुतीची सत्ता असून तिघांनी उत्तम प्रकारे कारभार चालवला आहे. मग; आम्ही देखील मावळ तालुक्यात महायुती म्हणूनच सर्व निवडणुका का लढू नये ? राष्ट्रवादी काँग्रेसचे तालुकाध्यक्ष गणेश खांडगे व इतर पदाधिकारी यांच्याबरोबर चर्चा करून तळेगाव भाजपचे शहराध्यक्ष संतोष दाभाडे यांची उमेदवारी आम्ही जाहीर केली.’’
आगामी निवडणुकीत तळेगाव नगरपरिषदेची जागा भाजपला मिळाल्यास महायुती म्हणून राष्ट्रवादी काँग्रेसचा पाठिंबा संतोष दाभाडे यांनाच राहील. तळेगाव शहरात संतोष दाभाडे यांनी जनसंघापासून भाजपचे प्रामाणिकपणे काम केले असून विधानसभा निवडणुकीत देखील त्यांनी महायुतीचा धर्म पाळला. मी विधानसभा निवडणुकीत १ लाख १० हजार मताधिक्याने विजयी झालो; तरी देखील मी नगराध्यक्षपदासाठी भाजपचा उमेदवार जाहीर केला. आगामी स्वराज्य संस्थांच्या निवडणुकीत आम्हाला बंडखोरी करायची नाही. बंडखोरी झाली; तर भाजपकडून होईल. तालुक्याच्या विकासासाठी मी राजकीय जोडे बाजूला ठेऊन काम करणार आहे. आगामी सर्व निवडणुकांत महायुतीतील सर्व नेते व कार्यकर्त्यांना बरोबर घेण्याचा माझा प्रयत्न राहील, असेही शेळके यांनी स्पष्ट केले.

विरोध झाला तरी रिंगणात ?
आमदारांनी तळेगाव दाभाडे नगराध्यक्षपदाचा उमेदवार म्हणून भाजपचे शहराध्यक्ष संतोष दाभाडे यांना जाहीर केलेल्या उमेदवारीबाबत भाजपचे नेते मंडळी काय निर्णय घेतात ? हे आगामी काळात कळेल. मात्र, एक आहे की आमदारांनी जाहीर केलेल्या उमेदवाराला भाजपच्या काही नेत्यांनी जरी विरोध केला तरी आमदार शेळके हे संतोष दाभाडे यांना कुठल्याही परिस्थितीत निवडणुकीच्या रिंगणात उतरवणार हे निश्चित आहे, अशी चर्चा मावळातील राजकीय वर्तुळात होती.