तळेगाव दाभाडे, ता. २५ ः शिरगाव येथे मेट्रोमोनीयल संकेतस्थळावरून ओळख झालेल्या व्यक्तीने लग्नाचे आमिष दाखवून एका महिलेची ११ लाख ८१ हजार ७५१ रुपयांची फसवणूक केल्याची घटना नुकतीच घडली आहे.
पोलिसांनी दिलेल्या माहितीनुसार, आरोपीचे नाव राकेश शेट्टी (रा. दक्षिण कन्नडा, कर्नाटक) आहे. नोव्हेंबर २०२४ ते जानेवारी २०२५ या कालावधीत फसवणूक झाली. पीडित महिलेसोबत एका मेट्रोमोनीयल संकेतस्थळावरून आरोपीची ओळख झाली होती. शेट्टीने महिलेशी सतत संपर्क वाढवत, मेसेज आणि फोनद्वारे विश्वास निर्माण केला. लग्नाचे आमिष दाखवून आरोपीने महिलेच्या क्रेडिट कार्ड, कर्ज अ‍ॅप्स आणि बँक अ‍ॅप्स चा वापर करत तिच्या नावावर कर्ज घेतले. त्यानंतर आरोपीने महिलेशी अचानक संपर्क तोडला व तिची फसवणूक केल्याचे स्पष्ट झाले. पीडितेच्या तक्रारीवरून शिरगाव पोलिस ठाण्यात फसवणुकीचा गुन्हा दाखल करण्यात आला असून, पुढील तपास पोलिस करत आहेत.