तळेगाव दाभाडे, ता. २७ : ‘‘राज्यात महायुती सरकार आहे. स्थानिक पातळीवरही स्वराज्य संस्थाच्या निवडणुकीत युती करा, असा वरिष्ठांचा आदेश आहे. आम्हीही युतीचा धर्म पाळू. फक्त तळेगाव दाभाडे नगर परिषदेसाठी नाही, तर सर्व निवडणुकांसाठी करा. उमेदवार जाहीर करण्याचा अधिकार पक्षाच्या कोअर कमिटीला आहे. इतर पक्षातील कोणीही भाजप उमेदवार जाहीर करू शकत नाही,’’ असे मत माजी राज्यमंत्री बाळा भेगडे यांनी व्यक्त केले.

आमदार सुनील शेळके यांनी तळेगाव दाभाडे नगराध्यक्षपदासाठी महायुतीचे उमेदवार म्हणून भाजपचे माजी शहराध्यक्ष संतोष दाभाडे यांची उमेदवारी नुकतीच जाहीर केली. याबाबत भाजप किसान मोर्चाचे प्रदेशाध्यक्ष गणेश भेगडे, तळेगाव दाभाडे-इंदोरी गणाचे अध्यक्ष चिराग खांडगे, माजी नगरसेवक सचिन टकले यांच्या उपस्थितीत माजी मंत्री भेगडे यांनी भूमिका मांडली. ते म्हणाले, ‘‘संतोष दाभाडे यांच्या उमेदवारीला आमचा आक्षेप नाही. पण, आमदारांना अधिकार नसताना चुकीच्या पद्धतीने उमेदवारी जाहीर केली. आगामी काळात होणाऱ्या जिल्हा परिषद, पंचायत समिती, लोणावळा व तळेगाव दाभाडे नगरपरिषद, वडगाव नगरपंचायत या सर्व निवडणुकांत युती करायची असेल, तर तिन्ही पक्षांतील प्रमुख नेतेमंडळींना घेऊन बसले पाहिजे. फक्त तळेगाव दाभाडे नगरपरिषदेसाठी युती करायची, बाकी ठिकाणी नाही, हे चालणार नाही. शहरात राष्ट्रवादी काँग्रेसकडे, नगराध्यक्षपदाचा उमेदवार नसावा, म्हणून भाजपचे संतोष दाभाडे यांची उमेदवारी जाहीर केली असावी.’’
---