तळेगाव दाभाडे, ता. ४ : जुन्या पुणे-मुंबई महामार्गावरील सोमाटणे फाटा, वडगाव फाटा आणि तळेगाव दाभाडे शहरातील काही ठिकाणी भरदिवसा खुलेआम देहविक्री सुरू आहे. दिवसा किंवा रात्री-अपरात्री या महिला रस्त्यावर उभ्या असतात. विशेष म्हणजे त्यांच्या आसपास चारचाकी वाहनही उभे असते. त्यामुळे स्थानिक नागरिक, विशेषतः महिला व मुलींना प्रवास करताना असुरक्षितता वाटते. या परिसरात वसाहती, शाळा-महाविद्यालये, कंपन्या असल्याने नागरिकांची कायम वर्दळ असते. त्यानंतरही वेश्याव्यवसाय उघडपणे सुरू राहणे चिंतेची बाब आहे. काही ठिकाणी तृतीयपंथीयांचाही सहभाग दिसतो. स्थानिक पोलिस अधूनमधून कारवाई करीत असले तरी ही वारंवार उद्भवते. त्यामुळे पोलिसांनी गस्त वाढवून तसेच गुप्त पद्धतीने तपास मोहीम राबवून संबंधितांवर कठोर कारवाई करावी, अशी मागणी नागरिकांनी केली आहे. याविषयी सामाजिक कार्यकर्ते दिलीप डोळस यांनी सांगितले की, ‘जुन्या पुणे-मुंबई महामार्गावरील सोमाटणे फाटा, सीआरपीएफ, वडगाव, तळेगाव अशा अनेक ठिकाणी रस्त्यावरच वेश्याव्यवसाय सुरू असतो. या भागात नागरिक आणि महिला प्रवाशांची सुरक्षितता धोक्यात आली आहे. पोलिस प्रशासनाने तातडीने लक्ष घालून संबंधितांवर कठोर कारवाई करावी.’
-----