तळेगाव दाभाडे, ता. ४ : कामशेत शहर परिसरात सध्या चोरट्यांनी उच्छाद मांडला आहे. यामुळे व्यापारी आणि नागरिकांत भीतीचे वातावरण आहे. दरम्यान, रविवारी रात्री एका कापड दुकानात चोरीचा प्रयत्न करणाऱ्याला ग्रामस्थांनी पकडून पोलिसांच्या ताब्यात दिले आहे. तर, चार महिला चोर पसार झाल्या.
कामशेतच्या श्री छत्रपती शिवाजी चौकात रॉयल कलेक्शन कापड दुकान आहे. तेथे चोरट्यासह चार महिला आल्या. त्यांनी खरेदीच्या बहाण्याने कपड्यांची चोरी केली. ही बाब दुकानमालक धीरज परमार यांच्या लक्षात आली. आरडाओरड केल्यानंतर येथील ग्रामस्थ रोहिदास वाळुंज व इतर नागरिकांनी चोरट्याला पकडले. या गोंधळात चार महिला पसार झाल्या. या प्रकरणात संतोष विनायक गायकवाड (वय २५, रा. अंबरनाथ) याच्यावर गुन्हा दाखल करण्यात आला आहे.

पोलिसांना जमले नाही, ते गावकऱ्यांनी केले
या बाबत ग्रामस्थ रोहिदास वाळुंज म्हणाले, ‘‘गेल्या वर्षभरात कामशेत परिसरात सुमारे २५ चोऱ्या झाल्या. त्यात एकही आरोपी पोलिसांना पकडता आला नाही. रविवारच्या चोरी प्रकरणातही पोलिसांना चोर पकडता आला नाही. पण, ग्रामस्थांनी पकडला. अशा प्रकारांकडे पोलिसांनी लक्ष देणे आवश्यक आहे.’’

आणखी एका किराणा दुकानात चोरी
रविवारी रात्री हा प्रकार घडल्यानंतर सोमवारी पहाटेदेखील एका किराणा दुकानात चोरट्यांनी हात साफ केले. तेथून त्यांनी रोकड आणि इतर वस्तू असा २० हजारांचा ऐवज पळवला. विशेष म्हणजे, घटनास्थळापासून पोलिस ठाणे हाकेच्या अंतरावर आहे.

पोलिसांवर तीव्र नाराजी
गेल्या वर्षभरात चोरांनी शहरात धुमाकूळ घातला असून, एकही चोरीचा छडा पोलिसांना लावता आला नाही. याबाबत व्यापाऱ्यांनी तीव्र नाराजी व्यक्त केली आहे.