तळेगाव दाभाडे, ता. १७ ः श्री डोळसनाथ महाराज शिक्षण प्रसारक मंडळ संचालित स्वामी विवेकानंद इंग्लिश स्कूल येथे संत ज्ञानेश्वर महाराज यांचा ७५०वा जन्मोत्सव सोहळा उत्साहात साजरा करण्यात आला.
कार्यक्रमाची सुरुवात शाळेच्या मुख्याध्यापिका रेणू शर्मा यांच्या हस्ते दीपप्रज्वलन व माउलींच्या प्रतिमा पूजनाने झाली. यावेळी चैताली भोसले व कीर्ती टपाले यांनी माउलींच्या जीवनप्रवासावर मनोगत व्यक्त केले. शाळेतील विद्यार्थिनींनी अभंगांच्या माध्यमातून माउली व विठ्ठलाचे वर्णन करून उपस्थितांना मंत्रमुग्ध केले. दरम्यान, रेणू शर्मा यांनी आपले विचार मांडताना ‘आता विश्वात्मकें देवें...’ या ज्ञानेश्वरीतील ओवीचा उल्लेख करत, संत ज्ञानेश्वरांनी अखिल विश्वाच्या कल्याणासाठी केलेल्या पसायदान प्रार्थनेची आठवण करून दिली. कार्यक्रमानिमित्त सामूहिक पसायदानाचे सामूहिक गायन करण्यात आले. नम्रता व सुनिता रेवणशेट्टी यांनी सूत्रसंचालन व आभार प्रदर्शन केले. याप्रसंगी मंडळाचे संस्थापक अध्यक्ष संतोष खांडगे, शालेय समिती अध्यक्षा रजनीगंधा खांडगे, कार्याध्यक्ष बाळासाहेब शिंदे व सचिव मिलिंद शेलार उपस्थित होते.