तळेगाव दाभाडे, ता. २१ : पावसाचे प्रमाण कमी झाल्याने पवना धरणातून विसर्ग कमी केला आहे. धरण १०० टक्क्यांवरून गुरुवारी सायंकाळी ९६.८९ टक्के भरले होते. सध्याची पाण्याची पातळी ६१२.९२ मीटर इतकी झाली असून उपयुक्त साठा २३३.५२ दशलक्ष घनमीटर आहे. धरण क्षेत्रात आजपर्यंत एकूण २१८० मि.मी. पावसाची नोंद झाली असून गुरुवारी सायंकाळी संपलेल्या २४ तासांत २ मि.मी. पाऊस झाला आहे. सध्या धरणातून ८०० क्युसेक पाणी वीज निर्मितीसाठी सोडले जात आहे. धरणाच्या जलप्रवेशद्वारांतून कोणताही विसर्ग सुरू नाही. नदीकाठच्या नागरिकांना प्रशासनाने सतर्क राहण्याचे आवाहन केले आहे.