तळेगाव दाभाडे, ता. ४ : पुणे-मुंबई जुन्या महामार्गावर नायगाव हद्दीत कारचालकाने दिलेल्या धडकेत दुचाकीवरील सहप्रवासी महिला गंभीर जखमी झाली होती. तिचा उपचारादरम्यान मृत्यू झाला. हा अपघात हा अपघात रविवारी (ता.३०ऑगस्ट) झाला. वैशाली मुरलीधर आरडे (वय ४५ रा. शिंदेवाडी वडेश्वर-आंदर मावळ) असे मृत महिलेचे नाव आहे.

याबाबत पोलिसांनी दिलेल्या माहितीनुसार, ‘‘वैशाली आणि त्यांचे पती कोंडीवडे येथील कार्यक्रमानंतर दुचाकीवरून परतत होते. त्यावेळी एका पांढऱ्या कारची धडक दुचाकीला बसली. यात वैशाली यांच्या डोक्याला गंभीर जखम झाली. त्यांना आधी तळेगाव दाभाडे येथील खासगी रुग्णालय आणि तेथून पिंपरी-चिंचवडला नेण्यात आले. दरम्यान, उपचार सुरू असताना दोन सप्टेंबर रोजी त्यांचा मृत्यू झाला.’’
‘‘धडक देऊन पळालेल्या कार चालकाची माहिती मिळाली असून, अधिक कारवाई लवकरच करण्यात येईल,’’ अशी माहिती पोलिस हवालदार अमोल तावरे यांनी दिली.