तळेगाव दाभाडे, ता. १० ः तळेगाव दाभाडे नगर परिषदेच्या नगराध्यक्ष व मुख्याधिकाऱ्यांना निवेदन देऊन पुण्यश्लोक राजमाता अहिल्यादेवी होळकर यांचे स्मारक उभारण्याची तसेच नगरपरिषद हद्दीतील शासकीय उद्यान किंवा सार्वजनिक इमारतीस त्यांचे नाव देण्याची मागणी करण्यात आली आहे.
माजी राज्यमंत्री बाळा भेगडे यांनी निवेदनात नमूद केले आहे की, पुण्यश्लोक अहिल्यादेवी होळकर या न्यायप्रिय, दूरदृष्टीच्या व लोककल्याणकारी प्रशासक होत्या. धर्म, संस्कृती, सामाजिक समता, स्त्री सशक्तीकरण व आदर्श प्रशासनाचे त्यांनी उदाहरण घालून दिले. तळेगाव दाभाडे हे ऐतिहासिक व सांस्कृतिकदृष्ट्या समृद्ध शहर असल्याने मारुती मंदिर चौक येथे त्यांचे स्मारक उभारावे, अशी मागणी नागरिक, सामाजिक संघटना व इतिहासप्रेमींनी केली आहे. तसेच नगरपरिषद हद्दीतील उद्यान, सार्वजनिक इमारत, सभागृह किंवा चौकाला पुण्यश्लोक अहिल्यादेवी होळकर यांचे नाव द्यावे, अशीही मागणी करण्यात आली आहे. या मागणीवर नगरपरिषदेने सकारात्मक विचार करून आवश्यक कार्यवाही करावी, अशी विनंती भेगडे यांनी केली आहे.