तळेगाव दाभाडे, ता. २८ : ‘‘महाराष्ट्राच्या विकासाला दिशा देत वेगाने पुढे नेणारे, ठाम निर्णयक्षमता, कार्यतत्परता आणि आपुलकीचा स्पर्श असणारे राष्ट्रवादी काँग्रेसचे अध्यक्ष व उपमुख्यमंत्री अजित पवार यांचे आकस्मिक जाणे अजूनही मनाला स्वीकारता येत नाही. असे दादा पुन्हा होणे नाही; मिळणे नाही,’’ अशा शब्दांत मावळचे राष्ट्रवादी काँग्रेसचे आमदार सुनील शेळके यांनी आपल्या भावना व्यक्त केल्या.
‘‘अजितदादा यांच्या अपघाती मृत्यूची घटना खरी आहे, हे मान्य करायला आमचे मन तयार होत नाही. मावळच्या विकासाला एका उंचीवर नेताना दादांनी माझा हट्ट पुरवताना कधीही आढेवेढे घेतले नाहीत. मी जे मागितले त्यापेक्षा कितीतरी अधिक त्यांनी दिले. मावळचा विकास हा त्यांच्या मनात कायम होता. आज दादा आपल्यात नाहीत, ही जाणीवच माझ्यासह मावळातील शेकडो कार्यकर्त्यांना निशब्द करणारी आहे,’’ असे शेळके म्हणाले.
‘‘दादा आणि माझे संबंध गेल्या सहा-सात वर्षांपासून अतिशय जिव्हाळ्याचे होते. जाहीर सभांमधील त्यांचे आश्वासक शब्द, लोकांसमोर मिश्किल पण तितक्याच आपुलकीने केलेली टिप्पणी आणि मावळातील जनतेवर असलेले त्यांचे खास प्रेम हे अजित पवार यांनी कृतीतून दाखवून दिले. आज दादांचे नसणे हे अनाकलनीय आहे. विकासकामांसाठी मी दादांकडे हट्ट करायचो. आता तो कुणाकडे करायचा, हा प्रश्न बोचत आहे. दादांचा अखेरचा निरोप घेतानाचा क्षण पोरका करणारा आहे. पवार कुटुंबीयांच्या दुःखात संपूर्ण मावळ तालुका सहभागी आहे,’’ अशा शब्दांत शेळके यांनी आपल्या भावनाा व्यक्त केल्या.