तळेगाव दाभाडे, ता. ७ ः खडकाळा कार्ला मतदार संघात सर्वाधिक मतदान कामशेत शहरात असल्याने सर्वपक्षीय उमेदवारांनी या शहरात लक्ष केंद्रित केले होते. कामशेत येथील सर्व मतदान केंद्रांवर सकाळपासूनच मतदारांच्या रांगा लागल्या होत्या. सायंकाळी चार वाजेपर्यंत ६० टक्के मतदान झाले.
खडकाळा कार्ला जिल्हा परिषद मतदारसंघात राष्ट्रवादी काँग्रेसचे दीपाली दीपक हुलावळे, खडकाळा पंचायत समिती गणात राष्ट्रवादी काँग्रेसचे समीर जाधव, खडकाळा-कार्ला जिल्हा परिषद मतदारसंघात भाजपच्या आशा बाबूराव वायकर, तर पंचायत समिती गणात प्रकाश गायकवाड हे तुल्यबळ उमेदवार आहेत. कामशेत शहरातील जास्तीत जास्त मतदान आपल्याला व्हावे यासाठी सकाळपासूनच उमेदवार आणि कार्यकर्ते सज्ज झाले होते. मतदारांच्या स्लीप, मतदान क्रमांक, मतदान कुठे आहे याची माहिती घेण्यासाठी बूथ वर मतदारांची गर्दी झाली होती. सकाळी साडेसात वाजता मतदानाला सुरवात झाली. साडेनऊ पर्यंत सर्व मतदान केंद्रावर गर्दी होती. दुपारी मतदानाचे प्रमाण थोडे कमी झाले. चारनंतर पुन्हा मतदानाचा वेग वाढला.
---