तळेगाव दाभाडे, ता. १० : तळेगाव दाभाडे येथील श्री छत्रपती शिवशंभु स्मारकाचे ॲाक्टोबर २०२५ मध्ये लोकार्पण झाले. या परिसरात वर्षभर ऐतिहासिक, सांस्कृतिक व सामाजिक उपक्रमांचे आयोजन करावे. स्मारकाच्या देखभाल व विकासासाठी नगर परिषदेकडून अर्थसंकल्पात स्वतंत्र आर्थिक तरतूद करावी, अशी मागणी श्री शिवशंभू स्मारक संस्थेने केली आहे.
या संदर्भात संस्थेच्या पदाधिकाऱ्यांनी मुख्याधिकारी गिरीश दापकेकर यांची भेट घेऊन निवेदन दिले. ‘‘श्री शिवशंभू स्मारक येथे शिवजयंती, शिवराज्याभिषेक दिन, विविध जयंती-उत्सव, शैक्षणिक व सांस्कृतिक कार्यक्रम नियमितपणे आयोजित केले जावेत, यासाठी निधीअभावी अनेक उपक्रम राबविताना अडचणी येतात. स्मारकाच्या जतन, स्वच्छता, प्रकाशयोजना व परिसर विकासासाठी तसेच वार्षिक उत्सवांसाठी नगर परिषदेकडून आर्थिक तरतूद झाल्यास अधिक दर्जेदार सुविधा देता येतील,’’ असेही संस्थेच्या वतीने सांगण्यात आले.
यावेळी संस्थेचे विश्वस्त व माजी नगराध्यक्ष रवींद्रनाथ दाभाडे, माजी नगरसेवक सुरेश दाभाडे, संदीप जगनाडे, कोषाध्यक्ष संजय बाविस्कर उपस्थित होते.