तळेगाव दाभाडे, ता. २३ : संत गाडगे महाराज यांच्या जयंतीनिमित्त तळेगाव दाभाडे नगरपरिषदेच्या वतीने ‘स्वच्छतादूतांचा सन्मान’ हा उपक्रम राबविण्यात आला. नगराध्यक्ष संतोष दाभाडे यांच्या संकल्पनेतून ही मोहीम साकारण्यात आली.
शहरातील विविध भागांत नागरिकांनी परिसरातील स्वच्छतादूतांचे औक्षण केले. अनेक ठिकाणी त्यांच्यावर पुष्पवृष्टी करण्यात आली, तर काही वस्त्यांमध्ये शाल, श्रीफळ व गुलाबपुष्प देऊन सन्मान करण्यात आला. नागरिकांनी व्यक्त केलेल्या कृतज्ञतेमुळे स्वच्छतादूतांमध्ये आनंदाचे वातावरण निर्माण झाले.
स्वच्छता ही केवळ नगरपरिषदेची जबाबदारी नसून ती समाजाची सामूहिक जबाबदारी आहे, हा संदेश यावेळी देण्यात आला.
हा उपक्रम एका दिवसापुरता मर्यादित न ठेवता वर्षभर स्वच्छतादूतांप्रति आदर राखावा आणि कचरा व्यवस्थापनात त्यांना सहकार्य करावे, असे आवाहन नगरपरिषदेच्या वतीने करण्यात आले.