टाकवे बुद्रूक, ता. ३० : जिल्हाधिकारी पुणे यांचे आदेशान्वये जिल्ह्यातील शिवकालीन ऐतिहासिक वारसा जतन करण्याच्या उद्देशाने ‘किल्ले बनविणे’ स्पर्धेचे आयोजन करण्यात आले आहे. दरम्यान, तालुकास्तरीय स्पर्धेत मावळ तालुक्यातील बहुसंख्य शाळा आणि गावांनी सहभाग घेऊन ऐतिहासिक वारसा प्रदर्शित करण्याचा प्रयत्न केला. त्यात कुसगाव बुद्रूक येथील शाळेने तालुकास्तरावर प्रथम क्रमांक पटकावला तर दुसरा क्रमांक कान्हे येथील शाळेने पटकावला. कुसगाव बुद्रूक येथील शाळेने हुबेहूब किल्ले राजगडाची प्रतिकृती साकारली होती. तर कान्हे शाळेने शिवरायांची जन्मभूमी असलेल्या ‘किल्ले शिवनेरी’ची प्रतिकृती निर्माण केली होती.

कुसगाव बुद्रूक येथील शाळा तसेच गावातील तरुण हे ऐतिहासिक वारसा जतन करण्याबाबत इतरांना प्रेरणा मिळावी यासाठी दरवर्षी किल्ल्यांच्या प्रतिकृती बनवत आहेत. गडसंवर्धन करत आहेत. तर शिक्षकांकडूनही विद्यार्थ्यांना गडकिल्ल्यांवर सहलीचे आयोजन करण्यात येत आहे. दोन्हीही गावांनी व शाळेने मिळवलेल्या या यशाबद्दल सर्व पंचक्रोशीतून अभिनंदनाचा वर्षाव होत आहे.

किल्ले प्रदर्शनाबरोबर ऐतिहासिक देखावा
कुसगाव बुद्रूक येथील शाळेने किल्ले राजगडसोबत जुनी नाणी-नोटा, ऐतिहासिक पुस्तके, ऐतिहासिक हत्यारे, तोफगोळे व इतर गोष्टींचेही प्रदर्शन ठेवले होते. तर कान्हे येथील शाळेने शिवकालीन खेळ, कलाकुसर, भांडी, नाणी-नोटा, हत्यारे यांचे प्रदर्शन गावपातळीवर घेतलेले साहित्य यांचा समावेश केला. शालेय ग्रंथालयात असलेली ऐतिहासिक पुस्तके सर्व विद्यार्थी आणि पालकांसाठी प्रदर्शित केली होती.

किल्ले पाहण्यासाठी मान्यवरांची उपस्थिती
कुसगाव बुद्रूक जिल्हा परिषद शाळा व श्री भैरवनाथ तरुण मंडळ यांनी साकारलेल्या किल्ले राजगड या किल्ल्याची प्रतिकृती पाहण्यासाठी आमदार सुनील शेळके, जिल्हा परिषद पुणे मुख्याधिकारी संतोष पाटील, उपविभागीय अधिकारी मावळ- मुळशी सुरेंद्र नवले, तहसीलदार मावळ विक्रम देशमुख, उपविभागीय पोलिस अधिकारी सत्यसाई कार्तिक, लोणावळा नगरपालिकेचे मुख्याधिकारी साबळे, गटविकास अधिकारी सुधीर भागवत, गटविकास अधिकारी के. के. प्रधान, महिला व बालकल्याण अधिकारी विशाल कोटवडे, इतिहास तज्ज्ञ प्रमोद बोराडे, शिक्षण विभाग अधिकारी सुदाम वाळुंज, विस्तार अधिकारी शोभा वहिले, मुकुंद तनपुरे, अमोल चव्हाण यांनी भेट दिली.