तळेगाव स्टेशन, ता. २३ : जिजामाता चौक ते स्टेशन रस्त्यावरील गतिरोधकांवर नगरपरिषद प्रशासनाने मारलेले पट्टे पुसट आणि दिसेनासे झाल्याने वेगात जाणाऱ्या दुचाकीस्वारांसह इतर वाहनचालकांच्या लक्षात येत नाहीत. त्यामुळे अचानक समोर आलेल्या गतिरोधकांवर वाहने आदळून छोटे-मोठे अपघात होत आहेत. रस्त्यावरील दुकानांसमोर भररस्त्यावर वाहने बेशिस्त पार्किंग केली जात असल्याने वाहतूक कोंडीची समस्या वाढत आहे. तळेगाव नगरपरिषद प्रशासनाने रस्ता सुरक्षेसाठी जिजामाता चौक ते स्टेशन रस्त्यावरील गतिरोधकांवर रात्री अंधारात चमकणारे, उच्च दर्जाच्या थर्मोप्लास्टिक पेंटचे पांढरे पट्टे मारावेत. बेशिस्त पार्किंगवर कारवाई करावी, या आशयाचे निवेदन मिलिंद अच्युत यांनी तळेगाव नगरपरिषदेच्या मुख्यधिकाऱ्यांना दिले आहे.