तळेगाव स्टेशन, ता. २१ : वगसम्राट दादू इंदुरीकर यांच्या जन्मशताब्दी वर्षाचे औचित्य साधून अखिल भारतीय मराठी नाट्य परिषदेच्या तळेगाव दाभाडे शाखेने राज्यस्तरीय एकांकिका स्पर्धा आयोजित केली आहे. ९ ते ११ ऑक्टोबर दरम्यानही स्पर्धा येईल.
शाखेचे संस्थापक अध्यक्ष सुरेश धोत्रे यांनी गुरुवारी पत्रकार परिषदेत ही माहिती दिली. विजेत्या संघाला वगसम्राट दादू इंदुरीकर करंडक देण्यात येईल. स्पर्धेच्या बोधचिन्हाचे अनावरण येत्या रविवारी (ता. २४) सायंकाळी सात वाजता होईल. नाना भालेराव कॉलनी येथे हा कार्यक्रम होईल. यावेळी खासदार श्रीरंग बारणे, आमदार सुनील शेळके आणि अभिनेते राजन भिसे यांची मुख्य उपस्थिती असेल.
तळेगाव दाभाडे येथील स्टेशन रस्त्यावरील कलापिनी सांस्कृतिक केंद्राच्या कै. डॉ. शं. वा. परांजपे नाट्यसंकुलात ही स्पर्धा होईल. त्यासाठी प्रवेशिका येत्या १० ते २० सप्टेंबर दरम्यान ऑनलाइन उपलब्ध असतील. मराठी नाटकांसाठी असलेली स्पर्धा राज्यातील सर्व हौशी नाट्यसंस्था, महाविद्यालये, औद्योगिक किंवा कार्यालयीन संघांसाठी खुली आहे. पहिल्या २५ प्रवेशिकांच्या संघांनाच स्पर्धेत प्रवेश मिळेल. प्रथम क्रमांकासाठी ५१ हजार, द्वितीय क्रमांकासाठी ३५ हजार, तर तृतीय क्रमांकासाठी २५ हजार रुपये बक्षीस असेल. इतर २० रोख पारितोषिके असतील. पारितोषिक वितरण समारंभ १२ ऑक्टोबर रोजी होईल. त्यावेळी पहिल्या दोन क्रमांकांच्या एकांकिकांचे प्रयोग सादर केले जातील.
पत्रकार परिषदेला नाट्य परिषदेच्या उपाध्यक्षा अपर्णा महाजन, कार्यवाह विश्वास देशपांडे, सचिव संजय वाडेकर आदी उपस्थित होते.
-----