तळेगाव स्टेशन, ता. २८ : जमिनीच्या वादातून कोयत्याने वार करत पुतण्याने चुलत्याचा खून केला. ही घटना जाधववाडी शिवारात जांभळीच्या रानावर सोमवारी मध्यरात्री (ता.२७) घडली. या प्रकरणात पुतण्या आणि त्याच्या सहकाऱ्याला अटक करण्यात आली आहे. त्यांना वडगाव मावळ न्यायालयाने पाच दिवसांची पोलिस कोठडी सुनावली आहे.
रवींद्र उर्फ रवी जाधव (वय ४४) असे खून झालेल्या व्यक्तीचे नाव आहे. तर, विशाल सुखदेव जाधव (वय २१) याला तळेगाव एमआयडीसी पोलिसांनी खेड येथून अटक केली. तर, दुसरा आरोपी ओंकार सोळसे (वय २२, तिन्हेवाडी रस्ता, खेड-राजगुरूनगर) याला गुन्हे शाखा युनिट ४च्या पथकाने पेठ पारगाव येथून अटक केली.
जमिनीची वाटणी आणि पीएमआरडीए पाइपलाइनचे मिळणारे पैसे या कारणांवरून विशाल आणि त्याच्या साथीदारांनी हा खून केल्याचे तपासात समोर आले, असे वरिष्ठ पोलिस निरीक्षक संतोष पाटील यांनी सांगितले. सोमवारी (ता.२७) सकाळी हा प्रकार उघडकीस आल्यानंतर याबाबत तळेगाव एमआयडीसी पोलिस ठाण्यात गुन्हा दाखल करण्यात आला आहे.