वडगाव मावळ, ता. १० : नवरात्रीनिमित्त येथील मोरया महिला प्रतिष्ठानच्या वतीने महिलांसाठी आयोजित करण्यात आलेल्या रास दांडिया गरबा प्रशिक्षण शिबिराचे उद्‍घाटन करण्यात आले.
मोरया महिला प्रतिष्ठानच्या वतीने शहरातील महिलांसाठी विविध उपक्रम राबविण्यात येत असून, त्याच अनुषंगाने नवरात्रीनिमित्त रास दांडिया गरबा प्रशिक्षण हा अनोखा उपक्रम राबविण्यात येत आहे. पाच दिवसीय प्रशिक्षण शिबिराचा प्रारंभ मोरया महिला प्रतिष्ठानच्या अध्यक्षा अबोली मयूर ढोरे यांच्या उपस्थितीत करण्यात आला. महिलांच्या कलागुणांना वाव मिळावा तसेच कलागुण सादर करण्यासाठी व्यासपीठ मिळावे या उद्देशाने हा उपक्रम राबविण्यात येत असल्याचे त्यांनी सांगितले. पुण्यातील व्हीजे फिटनेस क्लबचे प्रशिक्षक अजिंक्य बन्सी यांच्या मार्गदर्शनाखाली हे प्रशिक्षण होत आहे. शहरातील महिला भगिनींनी मोठ्या संख्येने सहभागी व्हावे, असे आवाहन अबोली ढोरे यांनी केले आहे.