वडगाव मावळ, ता.३ : तीन दिवसांपासून बेपत्ता झालेली येथील माळीनगर भागातील तीन अल्पवयीन बहिण-भावंडे शुक्रवारी दुपारी वेहरगाव येथील एकवीरा देवी मंदिर परिसरात आढळून आली. पोलिसांनी त्यांना त्यांच्या आईच्या स्वाधीन केले आहे.
प्रेम शरद हिवराळे (वय १३ वर्षे), भाग्यश्री शरद हिवराळे (वय ११ वर्षे) व प्रेरणा शरद हिवराळे (वय ९ वर्षे, तिघेही रा. माळीनगर, वडगाव मावळ) अशी या मुलांची नावे आहेत. वडगावचे पोलिस निरीक्षक कुमार कदम यांनी दिलेल्या माहितीनुसार, मंगळवारी (ता.३१) रात्री आठ वाजण्याच्या सुमारास ही तीनही मुले त्यांच्या राहत्या झोपडी समोरून बेपत्ता झाली होती. त्यांची आई स्वाती विजय रसाळ (वय ३०) यांनी गुरुवारी दुपारी वडगाव पोलिस ठाण्यात फिर्याद दिली होती. ही मुले नेहमी घर सोडून जात असल्याचे प्रकार यापूर्वीही घडले आहेत.