वडगाव मावळ, ता. २८ : मावळ तालुक्यात झालेल्या अवकाळी पावसामुळे भातपीक व भाजीपाला पिकांचे मोठ्या प्रमाणात नुकसान झाले आहे. त्यामुळे तातडीने पंचनामे करून शेतकऱ्यांना नुकसान भरपाई मिळवून द्यावी, अशी मागणी पुणे जिल्हा किसान युनियनने केली आहे.

युनियनचे संस्थापक अध्यक्ष माउली दाभाडे, माजी सभापती गणपतराव शेडगे, दत्तात्रेय आंद्रे, बाळासाहेब मोहोळ, लक्ष्मण शिरसट, रवींद्र ठाकर आदींनी तहसीलदार विक्रम देशमुख यांची भेट घेऊन निवेदन दिले. त्यात म्हटले आहे की, शनिवारी रात्रभर पडलेल्या पावसामुळे शेतातील भात पिकाचे मोठ्या प्रमाणात नुकसान झाले आहे. टोमॅटो व इतर पालेभाज्यांचे देखील नुकसान झाले आहे. सर्व मंडल विभागातून शेतकऱ्यांच्या नुकसानीचे पंचनामे करून त्यांना शासनाकडून नुकसान भरपाई मिळवून द्यावी अशी मागणी या निवेदनात केली आहे.