वडगाव मावळ, ता.१ : मावळ तालुक्यात खतांचा तुटवडा जाणवत असून खते न मिळाल्याने शेतकरी वर्ग चिंतेत आहे. भात पिकासाठी खताची गरज असल्याने तालुक्यातील खत पुरवठा त्वरित सुरळीत करावा, अशी मागणी मावळ तालुका राष्ट्रवादी युवक काँग्रेसने तालुका कृषी अधिकाऱ्यांकडे केली आहे.
मावळ तालुका राष्ट्रवादी युवक काँग्रेसचे अध्यक्ष किशोर सातकर, कार्याध्यक्ष सचिन मुऱ्हे, कृषी उत्पन्न बाजार समितीचे संचालक विक्रम कलावडे, ग्रामीण ब्लॉक कार्याध्यक्ष सोमनाथ वाघोले, भानुदास जांभुळकर, चेतन थोरवे, स्वप्निल मोढवे, अमोल काकरे, प्रशांत ओव्हाळ आदी पदाधिकाऱ्यांनी तालुका कृषी अधिकाऱ्यांची भेट घेऊन वरील निवेदन दिले. मावळ तालुका हा कृषी, पर्यटन, औद्योगिक क्षेत्रात महत्त्वाचा तालुका मानला जातो. मावळ तालुक्यात भाताचे उत्पादन मोठ्या प्रमाणात घेतले जात असून गुलाब फुले, फळ भाज्या यांचे क्षेत्रही मोठे आहे. या सर्व पिकांसाठी शेतकऱ्यांना खताची मोठ्या प्रमाणात गरज लागते. विशेष करून कृषी विभागाने प्रमाणित केलेल्या खते वितरकांकडून युरिया, महाधन व इतर खते उपलब्ध होणे गरजेचे आहे. सध्या सुरू असलेल्या खरीप हंगामामध्ये संपूर्ण तालुक्यात भात लावणीच्यावेळी आवश्यक असलेली खतांची मागणी लक्षात घेता त्यामध्ये तुटवडा जाणवत आहे. खते न मिळाल्याने शेतकरी चिंतेत असून काही ठिकाणी त्यांची आर्थिक फसवणूक होण्याची शक्यता नाकारता येत नाही. त्या अनुषंगाने तालुक्यातील शेतकऱ्यांचे आर्थिक नुकसान न होता खतांचा पुरवठा सुरळीत करावा, असे त्या निवेदनात म्हटले आहे.