वडगाव मावळ, ता. ११ ः आमदार सुनील शेळके यांच्या विशेष प्रयत्नाने वडगाव बाजारपेठेतील मुख्य रस्त्यावर सीसीटीव्ही कॅमेरे बसविण्यास सुरुवात करण्यात आली आहे अशी माहिती माजी नगराध्यक्ष मयूर ढोरे यांनी दिली.

वडगाव शहरामध्ये विद्यार्थिनी, महिला आणि नागरिकांच्या सुरक्षिततेसाठी तसेच, कायदा व सुव्यवस्था अबाधित राखण्यासाठी शहरात सार्वजनिक ठिकाणी सीसीटीव्ही कॅमेरे बसविण्याची मागणी वडगाव पोलिस स्टेशनने काही वर्षांपूर्वी नगरपंचायतीकडे केली होती. शहरातील महत्त्वाच्या व संवेदनशील ठिकाणी सीसीटीव्ही कॅमेरे बसविण्याच्या विषयाला १७ मार्च २०२३ मध्ये सभेत मान्यता देण्यात आली होती. नगरपंचायत फंडातून सुमारे एक कोटी ५७ लाख इतका निधी मंजूर झाल्यानंतर या कामाला सुरुवात करण्यात आली.

शहरामधील पंचायत समिती चौक, वडगाव न्यायालय, श्री पोटोबा महाराज मंदिर, जामा मस्जिद परिसर, भाजी मंडई, खंडोबा चौक, महादजी शिंदे उद्यान या ठिकाणी सुरुवातीला सीसीटीव्ही कॅमेरे बसवण्यात आले आहेत. पुढील काही दिवसात शहरातील कातवी, विशाल लॉन्स, माळीनगर, न्यू इंग्लिश स्कूल, केशवनगर आदी काही मुख्य चौकांमध्ये देखील सीसीटीव्ही कॅमेरे बसविण्यात येणार असल्याची माहिती मुख्याधिकारी डॉ. प्रवीण निकम व माजी नगराध्यक्ष मयूर ढोरे यांनी दिली. सीसीटीव्ही कॅमेरे बसविल्यामुळे महिला छेडछाड, चैन स्नॅचिंग, चोरी, हाणामारी यासारख्या घटनांना आळा बसून सुरक्षेमध्ये निश्चितच वाढ होऊन शहरवासीयांना मोठा दिलासा मिळेल. शहराच्या दृष्टीने हा खूप महत्त्वपूर्ण प्रकल्प असून प्रकल्प अहवालानुसार पूर्ण सुरक्षा यंत्रणा उभारण्यासाठी आणखी निधीची आवश्यकता आहे. शहरामध्ये सीसीटीव्ही कॅमेरे बसविण्यासाठी नगरपंचायत फंडा व्यतिरिक्त आमदार सुनील शेळके यांनी आमदार निधीमधून तसेच, जिल्हा नियोजन समितीच्या माध्यमातून निधी उपलब्ध करून देण्याचे आश्वासित केले आहे अशी माहिती माजी नगराध्यक्ष मयूर ढोरे यांनी दिली.