वडगाव मावळ, ता. ४ : राज्यासह मावळ तालुक्यातील शेतकऱ्यांचे विविध प्रश्न प्रलंबित आहेत. सरकार त्याकडे दुर्लक्ष करत आहे, असा आरोप करत मावळ तालुका काँग्रेस पक्षाने वडगाव येथील तहसील कार्यालयावर सोमवारी (ता.३) मोर्चा काढला.
ग्रामदैवत श्री पोटोबा महाराज मंदिरापासून काढण्यात आलेल्या मोर्चात ज्येष्ठ नेते चंद्रकांत सातकर, तालुकाध्यक्ष यशवंत मोहोळ, बाळासाहेब ढोरे, ॲड. खंडूजी तिकोने, राजू शिंदे, राजेश वाघोले, महादू खांदवे, रुपाली क्षीरसागर, वैशाली फाटक आदींसह कार्यकर्ते सहभागी होते.
राज्यातील शेतकऱ्यांचे प्रश्न, महिलांवर अत्याचार वाढत आहेत. युती सरकारने निवडणुकीपूर्वी शेतकऱ्यांना कर्जमाफीचे आश्वासन दिले होते. त्याची पूर्तता अजूनही करण्यात आलेली नाही, असा आरोप यावेळी कोपरा सभेत करण्यात आला.
यासह मुख्यमंत्री लाडकी बहीण योजनेंतर्गत प्रलंबित लाभार्थ्यांना न्याय द्यावा, पवना धरणग्रस्त व तालुक्यातील इतर धरणग्रस्त शेतकऱ्यांना भरपाई द्यावी, भूखंडाचे वाटप तातडीने करावे. संजय गांधी निराधार योजना व श्रावण बाळ योजना तातडीने सुरू कराव्यात. भूमी अभिलेख कार्यालयातील शेतकऱ्यांची कामे, मोजणीची प्रकरणे मार्गी लावावीत आदी मागण्यांचे निवेदन तहसीलदार विक्रम देशमुख यांना देण्यात आले.