वडगाव मावळ, ता. १३ : एका अज्ञात महिलेने येथील एका गृहिणीच्या गळ्यातील सुमारे एक लाख रुपये किमतीचे दीड तोळे सोन्याचे मंगळसूत्र चोरून नेले. ही घटना येथील पोटोबा मंदिर परिसरात घडली. ज्योती लोकरे (वय ३५, रा. लक्ष्मी सोसायटी, दिग्विजय कॉलनी, वडगाव) यांनी याप्रकरणी वडगाव पोलिस ठाण्यात फिर्याद दिली आहे. येथील पोटोबा मंदिराजवळ कीर्तनाचा कार्यक्रम संपल्यानंतर लोकरे या महाप्रसादासाठी महिलांच्या रांगेत उभ्या असताना अनोळखी महिलेने (वय अंदाजे ४० ते ४५) त्यांच्या गळ्यातील सुमारे एक लाख रुपये किमतीचे सोन्याचे मंगळसूत्र हिसकावून नेले. पोलिसांनी याप्रकरणी अज्ञात महिलेविरोधात गुन्हा दाखल केला आहे. पोलिस हवालदार आशिष काळे पुढील तपास करत आहेत.
---