वडगाव मावळ, ता. ४ : आषाढी एकादशीनिमित्त रविवारी (ता. ६) वडगाव शहरातील मांसाहारी दुकाने बंद ठेवावीत, अशी मागणी येथील श्री पोटोबा महाराज देवस्थान संस्थानने केली आहे. देवस्थानचे अध्यक्ष किरण भिलारे व सचिव अनंता कुडे यांनी याबाबत वडगाव नगरपंचायत व वडगाव पोलिस ठाण्यात निवेदन दिले आहे. रविवारी आषाढी एकादशीनिमित्त संपूर्ण राज्यात भक्तिमय वातावरण असणार आहे. या दिवशी वारकरी संप्रदायाने गावोगावी भजन, कीर्तन, प्रवचन आदी धार्मिक कार्यक्रमांचे आयोजन केले आहे. त्या अनुषंगाने या दिवशी वडगाव शहरातील सर्व मांसाहारी दुकाने बंद ठेवावीत. वडगाव नगरपंचायत व पोलिस ठाण्याने तसे आदेश संबंधित दुकानदारांना द्यावेत, अशी मागणी देवस्थानच्या वतीने करण्यात आली आहे.
---