वडगाव मावळ, ता. १२ : लोहगड किल्ल्याला जागतिक वारसा स्थळाचे स्थान मिळाल्यामुळे शनिवारी गडावर शिवप्रेमींनी आनंदोत्सव साजरा केला. वाद्यांचा गजर व जय भवानी, जय शिवाजी, हर हर महादेव या घोषणांनी गड दुमदुमुन गेला होता.
लोहगडासह बारा किल्ल्यांचा जागतिक वारसा स्थळांच्या यादीत समावेश झाल्याची घोषणा शुक्रवारी झाली. त्यामुळे शिवप्रेमींमध्ये आनंदाचे वातावरण पसरले. शनिवारी सकाळी लोहगड किल्ल्यावर मोठ्या संख्येने शिवप्रेमी, पुरातत्त्व विभागाचे अधिकारी, ग्रामस्थ जमा झाले. लोहगड पायथ्यावरील शिवस्मारकावरील शिवमूर्तीला पुष्पहार अर्पण करून कार्यक्रमाची सुरुवात झाली. फटाक्यांची आतषबाजी, वाजंत्रीच्या गजरात मिरवणूक काढण्यात आली. यावेळी पारंपरिक पद्धतीने फेटे बांधून शिवप्रेमी या मिरवणुकीत सहभागी झाले होते. लोहगड पायथ्यापर्यंत मिरवणूक गेली. साखर व लाडू वाटप करून सर्वांनी आनंदोत्सव साजरा केला. महिलांनी रांगोळ्या काढल्या होत्या. गडसंवर्धन चांगल्या पद्धतीने व्हावा अशी भावना शिवप्रेमींनी व्यक्त केली. केंद्र व महाराष्ट्र शासन, पुरातत्त्व विभाग यांचे अभिनंदन करण्यात आले.
यावेळी प्रांत अधिकारी सुरेंद्र नवले, तहसीलदार विक्रम देशमुख, पुरातत्त्व विभागाचे महाराष्ट्राचे सचिव विलास वाहने, पुरातत्त्व अधिकारी गजानन मुंडावरे, बजरंग येलेकर, सहाय्यक गट विकास अधिकारी सेवक थोरात, मंडलाधिकारी माणिक साबळे, माजी जिल्हा परिषद सदस्य अलका धानिवले, सरपंच सोनाली बैकर, उपसरपंच स्वाती मरगळे, सचिन टेकवडे, संदीप गाडे, विश्वास दौंडकर, गणेश धानिवले, श्रमिक गोजममुंडे, ग्रामपंचायत अधिकारी आर. एस. जोशी आदींसह लोहगड विसापूर विकास मंच, बजरंग दल, सह्याद्री प्रतिष्ठान, संपर्क आदी संस्थांचे कार्यकर्ते व शिवप्रेमी मोठ्या संख्येने हजर होते.
प्रांत सुरेंद्र नवले म्हणाले की, ‘‘लोहगड किल्ल्याचा जागतिक वारसा स्थळांच्या यादीत समावेश झाला ही आपल्या तालुक्यासाठी मोठी अभिमानाची बाब आहे. या घोषणेमुळे पर्यटनाला मोठी चालना मिळेल.’’