वडगाव मावळ, ता. २५ : प्रधानमंत्री पीक विमा योजना खरीप हंगाम २०२५-२६ मध्ये मावळ तालुक्यातील भात, भुईमूग आणि सोयाबीन या पिकांचा समावेश करण्यात आलेला आहे. या योजनेचा लाभ घेण्यासाठी ३१ जुलै २०२५ ही अंतिम मुदत आहे. मात्र तालुक्यातील शेतकऱ्यांनी अंतिम तारखेची वाट न पाहता त्यापूर्वी पीक विमा अर्ज भरण्याची कार्यवाही करावी, असे आवाहन तालुका कृषी अधिकारी मारुती साळे यांनी केले आहे.
नैसर्गिक आपत्ती, किड आणि रोगांसारख्या अकल्पित प्रतिकूल परिस्थितीमुळे पिकांचे नुकसान झाल्यास शेतकऱ्यांना विमा संरक्षण देणे, पिकांच्या नुकसानीच्या कठीण परिस्थितीतही शेतकऱ्यांचे आर्थिक स्थैर्य अबाधित राखणे, शेतकऱ्यांना नावीण्यपूर्ण व सुधारीत मशागतीचे तंत्रज्ञान व सामुग्री वापरण्यास प्रोत्साहन देणे ही योजनेची उद्दिष्टे आहेत.

योजनेची प्रमुख वैशिष्ट्ये
ही योजना केवळ अधीसूचित क्षेत्रातील अधिसूचित पिकांसाठी लागू आहे. कर्जदार व बिगर कर्जदार शेतकऱ्यांना अधिसूचित क्षेत्रातील अधिसूचित पिकांसाठी ही योजना ऐच्छिक आहे. तसेच, खातेदार व्यतिरिक्त कुळाने किंवा भाडेपट्टीवर शेती करणारे शेतकरीदेखील या योजनेत सहभागी होऊ शकतात. भाडेकरार अपलोड करणे अनिवार्य आहे. या योजनेअंतर्गत शेतकऱ्यांनी भरावयाचा विमा हप्ता खरीप हंगामासाठी २%, रब्बी हंगामासाठी १.५%, तसेच खरीप आणि रब्बी हंगामातील नगदी पिकांसाठी ५% ठेवण्यात आला आहे. मृत शेतकऱ्याच्या नावे किंवा अन्य अवैध मार्गांनी विमा घेतल्यास अर्ज रद्द केला जाईल. योजनेत सहभागी होण्यासाठी शेतकरी ओळख क्रमांक असणे अनिवार्य आहे.
मावळ तालुक्यात भातासाठी प्रतिहेक्टर विमा संरक्षित रक्कम ६१ हजार रुपये असून, शेतकरी हिस्सा प्रति हेक्टर ६१० रुपये एवढा आहे. भुईमुगासाठी प्रतिहेक्टर विमा संरक्षित रक्कम ४५ हजार रुपये असून, शेतकरी हिस्सा प्रतिहेक्टर ११२ रुपये ५० पैसे एवढा आहे. सोयाबीनसाठी प्रतिहेक्टर विमा संरक्षित रक्कम ५८ हजार रुपये असून, शेतकरी हिस्सा प्रति हेक्टर ५८० रुपये एवढा आहे.

अधिक माहितीसाठी संपर्क
भारतीय कृषी विमा कंपनी, केंद्र शासनाचा कृषी रक्षक पोर्टल, हेल्पलाइन नंबर १४४४७, जिल्हा मध्यवर्ती सहकारी बँक शाखा, राष्ट्रीयकृत बँक शाखा, विविध कार्यकारी सोसायट्या, सहाय्यक कृषी अधिकारी, उपकृषी अधिकारी, मंडळ कृषी अधिकारी, तालुका कृषी अधिकारी, तसेच CSC सेंटर यांच्याशी संपर्क साधावा, असे तालुका कृषी अधिकारी मारुती साळे यांनी आवाहन केले आहे.

पिक विमा अर्ज नोंदणी करण्याचे ठिकाण
- आपले सरकार सुविधा/महा ई सेवा केंद्र
- नजीकची राष्ट्रीयकृत बँक, जिल्हा मध्यवर्ती सहकारी बँक
- संकेतस्थळ- www.pmfby.gov.in

पिक विमा भरण्यासाठी आवश्यक कागदपत्रे
- ७/१२ उतारा
- बँक पासबुक
- आधार कार्ड
- पिक पेरा स्वयंघोषणापत्र
- शेतकरी ओळख क्रमांक

‘‘शेतकऱ्यांनी नैसर्गिक आपत्ती, कीड, रोगराईमुळे पिकांचे नुकसान या भविष्यातील संकटांपासून वाचण्यासाठी व स्वतःच्या आर्थिक संरक्षणासाठी पीक विमा नक्की काढावा. विमा घेतल्यामुळे निसर्गाच्या लहरीपणाचा आर्थिक फटका टाळता येतो. तालुक्यातील शेतकऱ्यांनी वेळेत अर्ज सादर करून या योजनेचा लाभ घ्यावा.
- मारुती साळे, मावळ तालुका कृषी अधिकारी
---