वडगाव मावळ/तळेगाव दाभाडे, ता. २८ : आरक्षणाच्या मागणीसाठी मनोज जरांगे यांच्या नेतृत्त्वाखालील लाखो मराठा बांधव गुरुवारी (ता.२८) मावळ तालुक्यातून मार्गस्थ झाले. दिवसभर वाहनांची रीघ लागल्याने पुणे-मुंबई महामार्गाला भगव्या लाटेचे स्वरूप प्राप्त झाले होते. दरम्यान, मावळ तालुका मराठा समाजातर्फे ठिकठिकाणी आंदोलकांचे स्वागत करण्यासह चहा, नाश्ता, पाणी आणि जेवणाची सुविधा उपलब्ध करण्यात आली होती.
मनोज जरांगे यांच्या नेतृत्वाखालील मराठा समाजबांधव २८ ऑगस्ट रोजी सकाळी दहा वाजता किल्ले शिवनेरी येथून मुंबईकडे रवाना झाले. गुरुवारी दिवसभर पुणे-मुंबई महामार्गावर मराठा बांधवांच्या वाहनांची रीघ लागली होती. ही वाहने राज्यातील विविध भागांतील विशेषतः मराठवाड्यातील आंदोलकांनी खचाखच भरलेली होती. समाजबांधव भगव्या टोप्या व भगवे उपरणे घालून ‘‘एक मराठा, लाख मराठा’’, ‘‘आरक्षण आमच्या हक्काचे’’, ‘‘आता नाही तर कधीच नाही’’ अशा घोषणा देत होते.
तालुक्यातील देहू फाटा, येलवाडी, इंदोरी, माळवाडी, तळेगाव दाभाडे, वडगाव तळेगाव फाटा, वडगाव, जांभूळ फाटा, कान्हे फाटा, कामशेत, कार्ला फाटा, वाकसई, लोणावळा, वरसोली टोल नाका येथे पिण्याचे पाणी, चहा, नाष्टा, फळे, न्याहरी असे विविध स्टॉल लावले होते. याच भागांत ठिकठिकाणी जरांगे यांच्या स्वागताची तयारी करण्यात आली. तर, रुग्णवाहिकेसह ठिकठिकाणी स्वयंसेवकही सज्ज होते.

चोख पोलिस बंदोबस्त
महामार्गावरील वाहतूक सुरळीत राहावी, आंदोलकांना पुढे जाता यावे यासाठी सर्व फाटे, सर्व चौक, छेद रस्ते, टोल नाके आदी ठिकाणी शेकडो पोलिस, होमगार्ड व सुरक्षा कर्मचाऱ्यांचा बंदोबस्त तैनात करण्यात आला होता. काही रस्ते बंद करण्यात आले होते. तालुक्यातील अनेक शाळाही लवकर सोडण्यात आल्या होत्या.

दिवसभरातील चित्र दृष्टीक्षेपात...
- आंदोलकांच्या वाहनांवर मनोज जरांगे यांचे छायाचित्र
- भगवे ध्वज, ध्वनिक्षेपक लावून आंदोलक सहभागी
- रिमझिम पावसातही आंदोलकांचा उत्साह
- महामार्गावर स्वागताचे बॅनर लावत वातावरणनिर्मिती
- पुष्पवृष्टीसाठी जेसीबी उभे करून तयारी
- काही आंदोलक बुधवारपासूनच मुंबईकडे