वडगाव मावळ, ता. १८ : मावळ तालुक्यातील सर्व माध्यमिक शाळांनी ‘मुख्यमंत्री माझी शाळा, सुंदर शाळा’ या स्पर्धात्मक अभियानाच्या तिसऱ्या टप्प्यात सहभागी व्हावे, असे आवाहन मावळ तालुका मुख्याध्यापक संघाचे अध्यक्ष विठ्ठल माळशिखरे व पुणे जिल्हा मुख्याध्यापक संघाचे कार्याध्यक्ष राजेश गायकवाड यांनी केली आहे.
महाराष्ट्र शासनाच्या शालेय शिक्षण व क्रीडा विभागाच्या वतीने हे अभियान राबवण्यात येत आहे. हे अभियान यशस्वी करावे , से आवाहन माध्यमिक मुख्याध्यापक संघाने केले आहे. या अभियानामुळे शैक्षणिक गुणवत्तेबरोबरच आरोग्य, स्वच्छता, पर्यावरण, क्रीडा आदी घटकांबाबत जागृती करून विद्यार्थ्यांच्या व्यक्तिमत्त्व विकासास चालना मिळू शकेल, असे जिल्हा मुख्याध्यापक संघाचे कार्याध्यक्ष राजेश गायकवाड यांनी सांगितले.
अभियान एकूण २०० गुणांचे आहे. एक जानेवारी ते सात फेब्रुवारी या कालावधीत मूल्यांकनाची प्रक्रिया करण्यात येईल. पायाभूत सुविधांसाठी ३८ गुण, शासन ध्येयधोरण अंमलबजावणीसाठी १०१ गुण व शैक्षणिक संपादणूकीसाठी ६१ गुण अशी विभागणी केली जाणार आहे.
तालुका पातळीवरील सहभागी शाळांमधून पहिले तीन क्रमांक काढण्यात येतील. शासनाकडून या स्पर्धेतील प्रथम क्रमांकास तीन लाख रुपये, दुसऱ्या क्रमांकास दोन लाख रुपये व तृतीय क्रमांकास एक लाख रुपये देण्यात येणार असल्याचे माळशिखरे यांनी सांगितले. तालुक्यातील सर्व शाळांनी विद्यार्थ्यांच्या सहभागातून हे अभियान राबवावे असे आवाहन करण्यात आलेले आहे. मावळ तालुक्यातील काही शाळांनी या अभियानात सहभागी होण्यासाठी जोरदार तयारी सुरू केली आहे.
-----