वडगाव मावळ, ता. १९ : मावळ तालुक्यातील निगडे येथे श्री काळभैरवनाथ देवाच्या उत्सवानिमित्त २१ ते २५ जानेवारी दरम्यान अखंड हरिनाम सप्ताहाचे आयोजन करण्यात आले असल्याची माहिती सरपंच भिकाजी भागवत यांनी दिली.
सप्ताहात दररोज पहाटे काकड आरती, सकाळी ९ ते १२ ज्ञानेश्वरी पारायण, सायंकाळी ४ ते ५ प्रवचन, सायंकाळी ७ ते ९ कीर्तन असा दिनक्रम राहील. सप्ताहात अनुक्रमे शिवाजी महाराज आगिवले, गणेश महाराज जांभळे, रामदास महाराज घुडे, निकिताताई भांगरे यांची प्रवचने व निवृत्ती महाराज देशमुख, सागर महाराज शिर्के, पुरुषोत्तम महाराज पाटील, माउली महाराज पठाडे यांची कीर्तने होतील. २५ जानेवारीला सकाळी १० ते १२ या वेळेत नितीन महाराज काकडे यांचे काल्याचे कीर्तन होईल. सोमवारी(ता. २६) श्री काळभैरवनाथ उत्सवानिमित्त सकाळी अभिषेक, सकाळी ८ वाजता मांडव टाहाळा, रात्री ८ वाजता पालखी मिरवणूक व १० वाजता पवळेवाडी येथील श्रीराम कला नाट्य मंडळाचे भजनी भारूड होईल. २७ तारखेला सकाळी ९ वाजता भारुडाची हजेरी होईल. समस्त ग्रामस्थांनी उत्सवाचे संयोजन केले आहे. पंचक्रोशीतील नागरिकांनी या कार्यक्रमांचा लाभ घ्यावा, असे आवाहन सरपंच भागवत यांनी केले आहे.