वडगाव मावळ, ता.१९ : मावळ शिक्षक प्रबोधन परिवाराच्यावतीने आदर्शांच्या जन्मोत्सव महिन्यानिमित्त आयोजित तीन दिवसीय वसंतचैतन्य व्याख्यानमालेला शिक्षकांचा उत्स्फूर्त प्रतिसाद मिळाला.
व्याख्यानमालेचे उद्‍घाटन आमदार सुनील शेळके व कुलस्वामिनी महिला मंचाच्या संस्थापिका सारिका शेळके यांच्या हस्ते झाले. पहिल्या दिवशी प्रसिद्ध कवियत्री गुंजन पाटील यांचे ‘जाऊ कवितांच्या गावा’ या विषयावर व्याख्यान झाले. शिक्षकांनी विद्यार्थ्यांमध्ये सर्जनशीलता आणि भावविश्व जागवले, तर शिक्षण अधिक अर्थपूर्ण ठरते, असे मत त्यांनी व्यक्त केले.
दुसऱ्या दिवशी प्रसिद्ध लेखक अरविंद जगताप यांचे ‘गोष्ट छोटी डोंगराएवढी’ या विषयावर व्याख्यान झाले. शिक्षकांनी विद्यार्थ्यांच्या आयुष्यातील छोट्या क्षणांनाही दिशा दिली, तर त्यातून मोठे परिवर्तन घडू शकते, असे त्यांनी नमूद केले. तर तिसऱ्या दिवशी ‘वेदना जाणावयास जागवू सहवेदना’ या विषयावरील व्याख्यानात बोलताना समाजसेवक यजुवेंद्र महाजन म्हणाले, ‘‘वेदना समजून घेणं आणि सहवेदना जागवणं हीच खरी शिक्षणाची ताकद आहे. शिक्षकांनी विद्यार्थ्यांच्या भावनांशी जोडले गेले, तर समाज अधिक संवेदनशील बनेल.’’
कार्यक्रमाच्या अध्यक्षस्थानी सभापती सुनीता येवले होत्या. विशेष अतिथी म्हणून उद्योजक अशोक बाफना, प्रवीण भोसले, माजी सभापती गुलाबराव म्हाळसकर उपस्थित होते. व्याख्यानमालेत दररोज १५ गुणवंत शिक्षकांचा मान्यवरांच्या हस्ते सन्मान करण्यात आला.