वाकड, ता. १८ : रावेत येथील संपूर्ण स्वास्थ्य योग परिवार यांच्या वतीने आंतरराष्ट्रीय योग दिनानिमित्त रविवारी (ता. १८) सकाळी आयोजित भव्य योग दिंडी प्रभात फेरी काढून योगाचे महत्त्व नागरिकांना पटवून देण्यात आले. रावेत येथून योग दिंडीला सुरुवात झाली. यावेळी भगवान महाराज जाधव व त्यांच्या भजनी मंडळाकडून हरी नामाचा गजर, भजन सादर करण्यात आले. तर चालू योग दिंडीत अनेक योग प्रात्यक्षिके दाखवण्यात आली. दिंडी दत्त मंदिर, शिंदे वस्तीपर्यंत जाऊन संपन्न झाली.
या भव्य योग दिंडी सोहळ्यात व योग प्रचारात वृक्ष संवर्धन व स्वास्थ योग केंद्र ग्रुपमधील सर्व सदस्य, आरोग्य प्रेमी, व्यायाम प्रेमी, निसर्ग प्रेमी व सर्व नागरिक सहभागी झाले होते. योगाचार्य महारुद्र शंकर शेटे, संपूर्ण स्वास्थ योग केंद्र परिवार यांनी योग दिंडी कार्यक्रमाचे आयोजन केले होते. पर्यावरण प्रेमी संजय रोकडे, दुर्गा टेकडी मैत्री ग्रुप तसेच रावेत पोलिस ठाण्यातील पोलिस अधिकारी व कर्मचाऱ्यांचे सहकार्य लाभले.