वाकड, ता. १८ : गुजरनगर, थेरगाव येथील धाइंजे शिक्षण संस्था संचलित लक्ष्मीबाई धाइंजे प्राथमिक विद्यालयात वाकड पोलिस ठाण्यातील दामिनी पथकाद्वारे किशोरवयीन विद्यार्थिनींसाठी सोमवारी (ता. १७) चर्चासत्र राबविण्यात आले. यावेळी महिला पोलिसांनी विद्यार्थिनींना विविध विषयांवर दिलखुलास माहिती दिली.
या सत्रात वाढते वय व त्याबरोबर होणारे शारीरीक बदल, समज-गैरसमज, आयुष्याचा अमूल्य ठेवा कायम कसा जपावा, मुलींची होणारी छेडछाड, गुड टच बॅड टच, होणारे अतिप्रसंग याविषयी माहिती देण्यात आली. वाकड पोलिस ठाण्यातील महिला पोलिस नाईक सुप्रिया पारसे व प्रियांका गायकवाड यांनी मुलींच्या शंकांचे निरसन केले. विविध विषयांवर मनमोकळ्या गप्पा मारत उपयुक्त माहिती दिली. यावेळी मुख्याध्यापिका स्मिता धाइंजे उपशिक्षका मनिषा कापडणीस, मानसी कपोले, सुप्रिया बोबडे, रेखा बनसोडे, रेवती मस्के, मंगला घाडगे, संगीता लडकत, संगीता साळवे आदी शिक्षक व विद्यार्थिनी उपस्थित होत्या.