वाकड, ता. ३ : दैनंदिन जीवनात आग लागण्यासारख्या काही आपत्कालीन परिस्थिती निर्माण होऊ शकते, अशा परिस्थितीत कोणती दक्षता घ्यावी, यासाठी थेरगाव येथील संचेती ज्युनिअर अॅण्ड सीनियर कॉलेजच्या पुढाकारातून व सेफ किड्स फाउंडेशनच्या वतीने आग प्रतिबंधात्मक व अग्निरोधकपर विविध प्रात्यक्षिके दाखविण्यात आले.
फाउंडेशनचे चेतन साळुंखे आणि कल्याणी चव्हाण यांनी आग लागण्याची कारणे व त्यावरील खबरदारीचे उपाय यावर व्याख्यान दिले. संचेती शैक्षणिक संकुलातील मैदानावर आग नियंत्रणासाठी वापरल्या जाणाऱ्या अग्नीरोधक यंत्राचा वापर तसेच ओल्या कपड्याच्या मदतीने आग कशी नियंत्रणात आणावी, याबाबत प्रात्यक्षिके विद्यार्थी व शिक्षकांच्या मदतीने सादर करण्यात आली. हा उपक्रम अनुभवण्यासाठी व प्रात्यक्षिके पाहण्यासाठी प्राचार्य, विभाग प्रमुख, सर्व शिक्षक व शिक्षकेत्तर कर्मचारी तसेच विद्यार्थ्यांची उपस्थिती होती. या प्रात्यक्षिकांचा सर्वांना दैनंदिन जीवनात उपयोग होईल, असा विश्वास प्राचार्यांनी व्यक्त केला.