वाकड, ता. १० : गणेशनगर, थेरगाव येथील शिव कॉलनीत महाशिवरात्री उत्सवानिमित्त आयोजित अखंड हरिनाम सप्ताहाचे व शिवलीलामृत ग्रंथ पारायणाचे गणेश महाराज कार्ले यांच्या काल्याच्या कीर्तनाने सांगता झाली. सुमारे तीन हजाराहून अधिक भाविकांनी काल्याच्या महाप्रसादाचा लाभ घेतला.
मावळचे खासदार श्रीरंग ऊर्फ अप्पा बारणे यांच्या विशेष सहकार्यातून व प्रमुख उपस्थितीत हा सोहळा पार पडला. तत्पूर्वी सप्ताहात रामचंद्र महाराज शिंदे, गायनाचार्य लक्ष्मण महाराज पांचाळ, शेखर महाराज जांभूळकर, प्रमोद महाराज पवार, शिवाजी महाराज खंडागळे, रामलिंग महाराज मोहिते, पांडुरंग महाराज शितोळे, महावीर महाराज सूर्यवंशी यांच्या प्रवचन सेवेचा लाभ भाविकांनी घेतला. दररोज पहाटे ४ ते ६ काकड आरती, शिवलीलामृत, गाथा भजन, दुपारी महिला भजनी मंडळाची सेवा, सायंकाळी प्रवचन नंतर हरिपाठ, कीर्तन, रात्री दहाच्या पुढे सार्वजनिक जागर होत असे.
महाशिवरात्री उत्सवाला मंदिरावर आकर्षक फुलांची सजावट व विद्युत रोषणाई केली होती. सायंकाळी परिसरातून टाळ-मृदंगाच्या गजरात व महिलांच्या फुगडीच्या रिंगणात निघालेल्या महादेवांच्या पालखीचे जागोजागी रांगोळीच्या पायघड्या घालून व फुलांच्या वर्षावात स्वागत झाले. सदाशिव कोंडे यांनी सूत्रसंचालन केले. शिव कॉलनी मित्र मंडळाच्या सर्व पदाधिकारी व कार्यकर्त्यांनी उत्तम व्यवस्थापन केले.