वाकड, ता. १ : वाकड दत्त मंदिर रस्ता, उत्कर्ष चौकापासून कस्पटे वस्तीकडे जाणारा रस्ता, वाकड गावठाण चौक, मानकर चौक, सावित्रीबाई फुले उद्यान, विशालनगर चौक आदी परिसर सध्या वाहतूक कोंडीचे ‘हॉट स्पॉट’ ठरत आहेत. विविध कारणांमुळे तेथे दोन - दोन तास वाहतूक कोंडी होत आहे.
वाकड, विशालनगर परिसरातील काही चौकांतील सिग्नल यंत्रणा कार्यरत असल्याने बहुधा येथे वाहतूक पोलिस थांबत नाहीत. मात्र, गेल्या चार दिवसांपासून त्यापैकी काही चौकांत सिग्नल यंत्रणा बंद पडत आहे. त्यातच वाहतूक पोलिस नसल्याचा गैरफायदा घेत बेशिस्त वाहन चालक उलट दिशेने येऊन उद्दामपणा करतात. अनेकजण मोटारी बेकायदा रस्त्यावरच उभ्या करतात. त्यामुळे वाहतूक कोंडी होते.
वाहतूक पोलिस येईपर्यंत वाहतुकीचा गुंता होतो आणि लांबपर्यंत रांगा लागून वाहन चालकांना रस्त्यात अडकून पडावे लागत आहे. त्यामुळे कायमस्वरूपी या चौकात वाहतूक पोलिस नेमण्याची मागणी आता जोर धरत आहे. तत्पूर्वी मान्सूनपूर्व पावसामुळे मानकर चौकात अनेक ठिकाणी खड्डे पडले आहेत तर पावसाच्या भीतीमुळे प्रत्येकजण मोटारीनेच प्रवास करत असल्याने मोटारीच्या रांगाच रांगा लागतात. मात्र, प्रत्येक मोटारीत एकच माणूस असे चित्र सध्या वाकडमधील रस्त्यांवर दिसत आहे. चाकण एमआयडीसीकडे जाणारे मोठमोठे कंटेनर देखील रस्त्यात थांबतात किंवा बिघाड होऊन बंद पडतात.

काय आहेत कारणे ?
- सिग्नल यंत्रणेत वारंवार होणारा बिघाड
- बेशिस्त व उद्दाम वाहनचालक, बेकायदा पार्किंग
- भर रस्त्यात थांबणारे मोठमोठे कंटेनर, लक्झरी बस

‘‘काही वाहन चालकांचा अतिशहाणपणा या समस्येला कारणीभूत ठरत आहे. वाहतूक कोंडी झाल्यास मी स्वतः कोंडी फोडण्यासाठी रस्त्यावर उभा राहतो. मात्र, अनेकांचा तोरा असा असतो, की मी म्हणतोय तेच खरं. ते कोणाचेही ऐकत नाहीत, अशा उद्धट वाहन चालकांमुळे वाकड भागात कोंडी होत आहे. त्यांच्याविरोधात वाहतूक पोलिसांनी प्रखर कारवाईचा बडगा उगारावा.
- महावीर गांधी, सामाजिक कार्यकर्ते

‘‘या भागासह सर्व चौकांत सिग्नल यंत्रणा कार्यरत आहे. त्यामुळे येथील वाहतूक आपोआप पुढे सरकते. मात्र, गेल्या काही दिवसांपासून विजेचा लपंडाव सुरू असल्याने सिग्नल यंत्रणा बंद पडत आहे. त्यामुळे ही कोंडी होत आहे. त्यावर उपाय म्हणून या भागात वाहतूक पोलिस, वॉर्डन यांची नेमणूक केली जाईल.
- सुनील पिंजण, वरिष्ठ पोलिस निरीक्षक, वाकड वाहतूक विभाग