वाकड, ता. २५ : थेरगाव येथील क्रांतिवीर चापेकर स्मारक समितीच्या लोकमान्य टिळक माध्यमिक विद्यालयात बहुविविध कौशल्य अभ्यासक्रमाचे नुकतेच उद्‍घाटन करण्यात आले.
मास्टेक फाउंडेशनचे सहकार्याने आत्मजा फाउंडेशन आणि नवजीवन सोशल ट्रस्ट यांच्या विद्यमाने हा उपक्रम आयोजित करण्यात आला आहे. संस्थेचे कार्यवाह सतीश गोरडे, उपाध्यक्ष डॉ. अशोक नगरकर, आत्मजा फाउंडेशनच्या डॉ. नीता मोहिते, संदीप सेन, प्रियांका मोहंती, डॉ. रंजना नवले, नितीन बारणे, सुहास पोफळे, राहुल बनगोंडे, डॉ. शकुंतला बन्सल, अतुल आडे, किरण इंगोले, आशा हुले, मंजुषा गोडसे, संकुलातील सर्व शिक्षक व शिक्षकेतर कर्मचारी उपस्थित होते.

हा अभ्यासक्रम ७० टक्के प्रात्यक्षिक व ३० टक्के लेखनावर आधारित आहे. अभ्यासक्रमामुळे विद्यार्थ्यांना आयटीआय, पॉलिटेक्निकल डिप्लोमा इत्यादी क्षेत्रांत राखीव जागा उपलब्ध होतील. स्वयंरोजगाराचा मार्ग खुला होईल, असे यावेळी सांगण्यात आले.
डॉ. नीता मोहिते यांनी प्रास्ताविक केले. युवराज मोहोळकर म्हणाले, ‘‘महाराष्ट्रातील ८५० शाखांमध्ये तंत्रशिक्षण विषय राबवला जात आहे. मन, मेंदू, मनगटाच्या उर्जेतून शिक्षण पूर्ण होते. डॉ. प्रीती राव यांनी ‘‘विद्यार्थ्यांचा कौशल्य विकास व्हावा, सक्षमीकरणासाठी स्वतः कार्यरत व्हावे आणि विद्यार्थी डिजिटल व रोजगारक्षमतेसाठी सक्षम बनावेत’’ असे आवाहन केले. संस्थेचे कार्यवाह सतीश गोरडे, उपाध्यक्ष डॉ. अशोक नगरकर यांनी सर्व फाउंडेशनचे आभार मानले. सुनिता घोडे यांनी मान्यवरांचा परिचय करून दिला. श्याम मस्तूद यांनी सूत्रसंचालन केले. प्रभारी मुख्याध्यापिका अश्विनी बाविस्कर यांनी आभार मानले.

असा आहे अभ्यासक्रम
अभियांत्रिकी कार्यशाळा : सुतारकाम, प्लंबिंग, वेल्डिंग, कन्स्ट्रक्शन, ट्रे थ्रेडिंग, टॅपिंग
उर्जा व पर्यावरण : जिना वायरिंग, गोडाउन वायरिंग, बल्ब लावणे, अर्थिंग करणे, घरातील उपकरणे (फॅन, इस्त्री, शेगडी इत्यादी) दुरुस्त करणे
शेती व पशुपालन : यामध्ये जमीन तयार करणे, मशागत, बीज प्रक्रिया, रोपे तयार करणे, सिंचनाच्या विविध पद्धती शिकवणे, टेरेस गार्डनिंग, व्हर्टिकल गार्डनिंग तसेच पाळीव प्राण्यांचे संगोपन
गृहआरोग्य : रक्तदाब तपासणे, पोषक आहार तयार, शेंगदाणा चिक्की, डिंक लाडू, कैरी, लिंबाचे लोणचे तयार करणे यांसारखी कौशल्ये.