वाकड, ता. २० : आयटीनगरी हिंजवडी व वाकड परिसरात पावसाने बुधवारी (ता.२०) विश्रांती घेतली. सकाळपासून वातावरण, ढगाळ असले तरी पावसाचा जोर कमी होता. त्यामुळे पाणी साचणे आणि वाहतूक कोंडीच्या समस्येतून सर्वांना तात्पुरता दिलासा मिळाला आहे.
हिंजवडी आयटी हबमधील कर्मचारी आणि रहिवाशांनी रस्त्यावरील खड्ड्यांमुळे होणाऱ्या त्रासाबाबत नाराजी व्यक्त केली. तर, कोरड्या वातावरणामुळे दैनंदिन कामे सुलभ झाली. दरम्यान, सलग चार दिवस पावसाने झोडपल्यामुळे रस्त्यांची दुरवस्था उघडी पडली आहे.

शाळांना सुट्टी देण्याची मागणी
पावसाचा जोर पाहता मुळशी तालुक्यात शाळांना सुट्टी देण्यात यावी, अशी मागणी मुळशी तहसीलदार व पुणे जिल्हा परिषदेचे मुख्य कार्यकारी अधिकारी गजानन पाटील यांच्याकडे करण्यात आली आहे. याबाबत सामाजिक कार्यकर्ते विलास साखरे यांनी निवेदन दिले आहे. सोबतच जास्त पाऊस काळात मुळशीतील पर्यटनावर प्रतिबंध घालावा. संबंधित भागांत गस्त वाढवावी, असे निवेदनात म्हटले आहे.