वाकड, ता. २९ : पूरग्रस्त विद्यार्थ्यांना मदत करण्यासाठी पिंपरी चिंचवडमधील नामांकित इंदिरा विद्यापीठाने पुढाकार घेतला आहे. या विद्यार्थ्यांना विशेष प्रवेश योजनेद्वारे मोफत शिक्षण दिले जाणार आहे. यातून या गरजू विद्यार्थ्यांना पदवी आणि पदव्युत्तर अभ्यासक्रमांसाठी संधी मिळणार आहे.
इंदिरा विद्यापीठाच्या स्कूल ऑफ बिझनेस, स्कूल ऑफ कॉमर्स अँड इकॉनॉमिक्स, स्कूल ऑफ इन्फॉर्मेशन टेक्नॉलॉजी, स्कूल ऑफ फार्मसी आणि स्कूल ऑफ लिबरल आर्ट्स या शाखांमध्ये प्रवेशासाठी ही योजना खुली आहे. इंदिरा विद्यापीठ आपल्या प्रत्येक विद्यार्थ्याच्या नव्या सुरुवातीसाठी कटिबद्ध असल्याचे विद्यापीठाच्या अध्यक्षा डॉ. तरिता शंकर यांनी सांगितले.
संकटाच्या काळातही शिक्षणाचा हात सोडू नये, यासाठी विद्यापीठाने उचललेले हे पाऊल समाजातील प्रत्येक घटकासाठी प्रेरणादायी ठरणार आहे.
अर्जदाराने स्थानिक प्रशासनाकडून (तलाठी, ग्रामसेवक, महसूल विभाग) जारी केलेला अधिकृत पंचनामा सादर करणे अनिवार्य आहे. प्रवेशाची अंतिम मुदत ३१ ऑक्टोबर २०२५ आहे, विद्यार्थ्यांनी संधीचा लाभ घेण्यासाठी वेळेत अर्ज करावा, अधिक माहितीसाठी विद्यापीठाशी संपर्क साधण्याचे आवाहन करण्यात आले आहे.