वाकड, ता. २ : गणेशनगर, थेरगाव येथील तक्षशिला बुद्ध विहारात वर्षावास समारंभानिमित्त डॉ. बाबासाहेब आंबेडकर लिखित ‘तथागत गौतम आणि त्यांचा धम्म’ या विषयावरील ग्रंथवाचन सोहळ्याची विविध उपक्रमांनी सांगता झाली.
खासदार श्रीरंग बारणे यांच्या हस्ते पंचशील ध्वजाचे वंदन झाले. नागरिक सुरक्षा समितीचे अध्यक्ष मानव कांबळे अध्यक्षस्थानी होते. यावेळी बारणे म्हणाले, ‘‘संविधानाचे निर्माते डॉ. बाबासाहेब आंबेडकर यांनी भारताच्या व्यापक सामाजिक आणि सांस्कृतिक विविधतेला लक्षात घेऊन सर्वसमावेशक आणि गतिमान चौकट तयार केली. संविधानात मूलभूत हक्कांच्या समावेशासाठी महत्त्वपूर्ण भूमिका बजावली. अस्पृश्यता निर्मूलन आणि सर्व प्रकारच्या भेदभावांना प्रतिबंध करणाऱ्या कलमांचा अंतर्भाव केला.’’
यानिमित्त भगवान गौतम बुद्ध आणि त्यांचा धम्म या ग्रंथाची मिरवणूक काढण्यात आली. आशा लगड, लक्ष्मी पालकर, मीरा घाडगे, अनिता घोरपडे, महानंदा कांबळे आदी महिलांनी संयोजन केले. संघाचे अध्यक्ष दिलीप रणपिसे यांनी प्रास्ताविक केले. शांताराम क्षीरसागर यांनी सूत्रसंचालन केले. भैय्यासाहेब भागवत यांनी आभार मानले. पंडित बाविस्कर यांनी ग्रंथ वाचनाने सांगता केली.

WKD25A09762