वाकड, ता. ८ : येथील आयआयईबीएम संस्थेच्या इंडस बिझनेस स्कूलतर्फे ‘पराक्रम’ या वार्षिक क्रीडा महोत्सवाला सुरुवात झाली. यामध्ये क्रिकेट, खो- खो, कब्बडी, बॅडमिंटन, व्हॉलिबॉल, टेबल टेनिस, बुद्धिबळ, कॅरम, मैदानी व इतर २३ खेळांचा समावेश आहे.

राष्ट्रीय टेबल टेनिस पदक विजेते संतोष वक्राडकर यांच्या हस्ते या सप्ताहाचे उद्घाटन झाले. यावेळी संस्थेचे अध्यक्ष कर्नल विनोद मारवाह, व्यवस्थापकीय संचालक डॉ. जयसिंग मारवाह, अधिष्ठाता डॉ. पूनम निकम, कर्नल रवींद्र कुमार, संचालक राजीव सिंग, क्रीडा समिती प्रमुख प्रा. सदानंद पेटकर, प्रा. विशाल देसाई, संदीप कणसे, समन्वयक बापू पवार, सर्व शिक्षक आणि शिक्षकेतर कर्मचारी आणि विद्यार्थी उपस्थित होते.
विद्यार्थ्यांना मार्गदर्शन करताना वक्राडकर म्हणाले, ‘‘तरुणांनो खेळ हा तुमच्या आयुष्याचा अविभाज्य घटक बनला पाहिजे. निरोगी आयुष्य जगायचं असेल, तर खेळत राहा. ही स्पर्धा होत आहे त्याचा अतिशय आनंद होत आहे त्यात जय-पराजय होत राहील, त्याचा विचार करू नका आपण निरोगी आयुष्यासाठी सतत खेळत राहिले पाहिजे.’’